رجعنا للمدونة بعد غياب حوالي 3 شهور لأسباب خارجة عن إرادتي, ومن اليوم رح ترجعوا تقرئوا مواضيع يومية في مدونة أسكدنيا, وبشكر كل اللي بعثولي إيميلات وبحب احكيلهم اني لسة عايش .
الموضوع اللي بدي أحكي فيو اليوم هو عن الخبر اللي نشر في الصحف الأردنية حوّل تطبيق وزارة الصحة قرار “إستيفاء 15 دينار عن كل وحدة دم من الأردنيين و40 دينار من الأجانب” حيث يقول الخبر في تفاصيلة:
تبدأ الحكومة اعتبارا من يوم غد الأحد، استيفاء 15 دينارا بدل كلفة وحدة الدم ومكوناتها من المواطنين، و40 دينارا من غير الأردنيين، على أن يتم تحويل المبالغ المستوفاة إلى إدارة التأمين الصحي بوزارة الصحة. وجاءت هذه الخطوة بعد أن أقرت لجنة رسمية، شكلها وزير الصحة الدكتور نايف الفايز، لائحة الأسعار الجديدة التي وافق عليها مجلس الوزراء مؤخرا.
وتفيد اللائحة بأن “يدفع المرضى الأردنيون غير المؤمنين صحيا 15 دينارا مقابل كل وحدة دم، تفحص مخبريا”، مع الاستمرار في التبرع بوحدة دم مقابل وحدة أخرى جاهزة، فحصت مخبريا سابقا.
وحول تسعيرة وحدات الدم لمستشفيات القطاع الخاص، ألزمت التسعيرة الجديدة دفع 30 دينارا أردنيا مقابل كل وحدة دم، يثبت سعرها على الفاتورة العلاجية للمرضى الأردنيين، في حين تصل التسعيرة لغير الأردنيين الذين يتعالجون في مستشفيات الوزارة أو القطاع الخاص إلى 40 دينارا أردنيا، مقابل كل وحدة تفحص مخبريا.
إنتهى الإقتباس…
يعني وزارة المسالخ العامة والدم والأعضاء ما لاقت غير الدم لتفرض علية رسوم لسد عجزها؟ بهنيكم على القرار الأكثر من ذكي والي بدل على حرص الوزارة والحكومة من وراءها على إثبات أن دم المواطن الأردني “غالي جداً” ومش أي حد بقدر يشترية غير اللي معو, واللي معوش راحت في **** (حذفت لغايات تتعلق بالحفاظ على الجودة).
المعادلة ببساطة, إنه بيجي المواطن الغلبان بتبرع بالدم سواء لأسباب دينية (صدقة جارية) أو لأسباب صحية مثلاً, والجماعة بيعطوه علبة عصير أبو الـ 20 قرش, كثير والله, وبعدين ببيعوا دموا بـ 15 دينار أو 30 دينار للمستشفيات, والله تجارة رابحة جداً جداً, وصاحب الفكرة بدو جائزة نوبل لمص دم العالم!
بس ما عرفنا إذا في ضريبة مبيعات على الدم؟ مش واقفة عليها, وكمان ضريبة خاصة عشان تكون البيعة محرزة.
والله عيب, بكرة بصير في تسعيرة لبيع الأعضاء, الكلية بـ 150 دينار والكبدة بـ 120 دينار والمعدة بتنباع بالكيلو.
سؤال… البيضات رح ينباعوا بالحبة ولا بالكيلو؟؟
سلامة خيركم.
وحول تسعيرة وحدات الدم لمستشفيات القطاع الخاص، ألزمت التسعيرة الجديدة دفع 30 دينارا أردنيا مقابل كل وحدة دم، يثبت سعرها على الفاتورة العلاجية للمرضى الأردنيين، في حين تصل التسعيرة لغير الأردنيين الذين يتعالجون في مستشفيات الوزارة أو القطاع الخاص إلى 40 دينارا أردنيا، مقابل كل وحدة تفحص مخبريا.
on 
on 
18 عدد التعليقات
at 12:48 pm - 21st February 2010 Permalink
والله صديقي بالنسبه للبيض … أظن رح يكون 12.5 + ضريبه 16.4% للبيضه الواحده, أما بالنسبه لفلس البيض والله أعلم رح يكون 3.45 قرش على الغلاف و 4.55 للداخل …
في عندك ضريبه على قيمة الأستهلاك للبيضه تعد 4% لكل سنه ” أو حسب الأحصاءات 174 واحد”
طبعا بفرق عندك الأسعار بين مواطن أردني و من جنسيات أخرى.
طبعا أختلاف الأسعار يختلف ..
البيض الأجنبي يقل سعره عن البيض البلدي ….
و يكون أيضا الأختلاف في الوزن عامل مهم جدا في سعر البيضه …
تتوقع دائرة “الإخصائات” ان يكون هناك طلب أكثر على الجهة اليمين, بسبب كثرة تعطلها …
أرجو أن تكون هذه المعلومات مفيده لكم …
شكرا صديقي
at 1:23 pm - 21st February 2010 Permalink
ان شاء الله ما رح يكون في تسعيرات للدم الخفيف و الدم الثقيل كمان
و بالنسبة لسؤالك بتصور انهم بنباعوا فرط ، وممكن يعملوا عروض خاصة على الجوز بمناسبة الشهر الفضيل
at 1:23 pm - 21st February 2010 Permalink
here in Ireland they take mabla’3 ramzi for blood, less than 2 pound as a administrative fees… wallah 7aram..
I miss Jordan law enha ’3alye ktheeer
at 1:32 pm - 21st February 2010 Permalink
ya zalame wenk msh mbyen men zaman? La teg63na
t7sesh el blog had. shar elbalya ma yd7k,walah bkra l7 tlage tax 3l hawa kman..donia a5r zman
at 4:10 pm - 21st February 2010 Permalink
والله هاد الخبر الي فتحت عليه عيني اليوم الصبح
بس والله ما بعرف كيف زبطت معهم
طريقه ذكيه لسد العجز ولمص دم المواطن بيصير المص مادي ومعنوي بالفلوس وبالدم يلا عقبال ضريبه الهوا
بالنسبه للبييض رح يكون بالحبه متل الكلاوي والكبده لتحقيق الاستفاده الاكبر طبعا
at 8:02 pm - 21st February 2010 Permalink
ما هو خلص الانسان عندنا عبارة عن بقرة بحلبوها بتطلع مصاري!
شو ما يطلع معهم بحطوا!
هو حدا بسأل فيهم وين رايحين و وين جايين ؟
يعني لما حطوا الضريبة الإضافية على الموبايلات و الحكومة الذكية بررتها انو لـ”مصلحة المواطن” علشان يخفف مكالمات أحسن؟!؟!
خربت خربت, لازم يمكلوها منيح!
at 12:41 pm - 22nd February 2010 Permalink
والله إنا لله وإنا إليه راجعون …
والله إذا الدم اللي بنتبرع فيه عن طيب نفس لنساعد انسان مسكين ومحتاجها بدو ينباع بفلوس علشان نذل هالمسكين من جهة ومن جهة تانية بنخلي الناس تبطل تتبرع بتالي بموت هالمريض وبتخف هالكثافة السكانية العالية والازمة الاقتصادية ..والله القرار كله حكمة بس كيف اجى على بالهم مش عارف … الله العليم شكلو خلصت المشاكل وضلت مشكلة الدم
بس كان عندي سوائل :إذا الدم كان من سلالات جيدة ومميزة راح يكون السعر أغلى ولا شو ؟
أكيد صاحب هالقرار الجني خطرته الفكرة!
at 12:44 pm - 22nd February 2010 Permalink
اول شي الحمدلله على السلامه
تاني شي في النهايه رح ننباع احنا توكل على الله ….. و رجعه نار بيني و بينك اشتقنالك و دير بالك على البيضات
at 1:38 pm - 22nd February 2010 Permalink
والله هلا و غلا وإشتقنالك لا تعيد هالغيبة الطويلة وتحرمنا من مواضيعك الجديدة دائما” ولو إني كنت بتمنى تكون أول مواضيعك أكثر تفاؤل من هالموضوع المحزن(بيع الإنسان وحشوته)شي بخجل
at 2:04 pm - 22nd February 2010 Permalink
والله حرام يالي بصير يا جماعه هو ما بقي غير دم الناس ليبيعو ويشترو فيه كمان الله يستر من تاليها بشو رح تصير حكومتنا الرشيده تعرض سلع باين عليها حكومه اقتصاديه عن جد ورح ينعكس على المواطن ولا يعكسوا المواطن ؟شكله صاير شح في الدم عند المواطن لانه مسكين ما بقي عنده دم نشفوه برفع هالاسعار 0الله يستر من تاليها
at 6:07 pm - 22nd February 2010 Permalink
والله مش شايفة فيها شي
عادي جدا
الحكومة بدها تسد العجز
بس مش غالي شوي ع الاجانب ولاشو؟
at 8:10 pm - 22nd February 2010 Permalink
يازلمة هي واقفة عل دم؟ كل شي عم يغلى وبس الانسان عم يرخص
قال بقلك تطوير وتنمية مستدامة قال،اي انت بس تطلع برات عمان باتجاه الزرقاء او اربد او اي محافظة مابتشوف غير الفقر والاهمال
يعني الاردن هي عمان الغربية بس
اخ يادمي بدي اروح ابيعو بلاش بكرة يتاخد مني ببلاش
حبيت موقعك
at 10:44 am - 23rd February 2010 Permalink
ولله يا أخوان ما ضل شي ألا ما حطو عليه ضرائب وقبلنا بس دم يفرضو عليه ضرائب ما عمري أسمعتها في حياتي ودايما بقولو انو أتجاره في الاعضاء البشريه (حرام) وممنوع وهما بتاجرو في دم مش دمهم كيف بتصير يا أخوان مش حرام لتاجرو في دم مش دمهم وما أستأذنو صاحب الدم أنهم أبيعوه (وأصاحب أدم بيكون متبرع فيه لله تعالى لمساعدت الغير أو لأسباب صحيه عشان ربنا يشفيه من المرض ( حسبيا الله ونعم الوكيل)
at 11:23 pm - 23rd February 2010 Permalink
هههههههههههههههههههههههههههههههههههه ياجماعة خذ الحياة كما جائتك مبتسما في كفا الغار اوفي كفها العدم هو في احلى من انو يتاجرو بدمنا بدل ماتيجي امريكا تتحتلنا بعيد الشر
ويصير دمنا ينكب بالشوارع الله يخلي الحكومة الي عرفنا قيمة دمنا
وبعدين عادي يااخوان احنا ببلد ثروتها الانسان والانسان في دم
شو البترول احسن
بس ياجماعة الخوف انو بكرة تفتح عنا شركات اجنبية للتنقيب عن دم الانسان الادرني
وبعدين الحل ذكي عارفين ليش لانهم عارفين انو مع غلاء الاسعار
صاحب الصدقة الجارية والي عندو دم فائض رح يبطل عندو دم
يعني احسبوها صح فكرو ببكرة يااخوان بدل مانصير نشحد الدم شحدة
بنوفرو لاخرتنا
تيك ات ايزي
at 10:13 pm - 24th February 2010 Permalink
w r7 y9reo yebe3o ba$er kman ha ha ha
be7bo al moawten al ardone kteeeer
at 2:05 pm - 25th February 2010 Permalink
عندي سؤاااااااااال…..
هو البيييض، بصفار وللا بصفارتيين؟؟؟؟؟!!!
يعني اكيد بيفرق بالسعر…
at 6:02 pm - 25th February 2010 Permalink
يعطيك العافية
ما عندي جديد اضيفه علىالتعاليق والتواقيع السابقة
لا حول ولا قوة الا بالله العلي العظيم
at 8:23 am - 26th February 2010 Permalink
الضريبة على الموبايل عشان المواطن يخفف حكي … و على الدم عشان المواطن يخفف ايش ..دمه
المشكلة انو دمنا محروق و الوحة ب 15 دينار … كيف لو كان دم سويدي او كندي مش محروق او فاير و منتهية صلاحيته
Trackbacks & Pingbacks 1
[...] وحدة دم من الأردنيين و40 دينار من الأجانب، أثارت انتقاد مدونة اسكادنيا، بعنوان “دم للبيع لحق حالك” يكتب “وزارة [...]
أرسل تعليقاً