صرلي أكتر من أسبوع مش قادر أحك راسي من الشغل الي عندي, بالأضافة الى أنه أخوي كان بزيارة نقاهة لدبي..
ما علينا, اليوم وصلتني دعوة على الفيس بوك لجروب بدعي لتنظيم أضراب عام بالأردن بتاريه 4-5-2008.. القائمين على الجروب كاتبين مطالب وشروط للمشاركة في الأضراب, وهو عبارة عن ألتزام البيت لغاية الساعة 11 في اليوم المذكور, طبعاً الشغلة هاي “لو” زبطت وصارت صارت رح تخلي الشعب يضل بالبيت طول اليوم وبحكيلك أجازة اليوم,والنص التاني رح يستغل الفرصة ليعمل سياحة داخلية ورح تصير نسبة أشغال حجوزات فنادق العقبة 100%.. هاد على فرض أنه الموضوع مش فكرة واحد زهقان فتح جروب ولم العالم الزهقانة على الفيس بوك
على كل حال, هيّ مقتطفات من الجروب… وانا من عندي بنصحهم بالتعري بالشوارع بدل حبس حالهم بالبيت عشان يوصلوا المسج للحكومة بطريقة “أكثر” تأثيراً…
لعيون الأردن، ولعيون مصر… تضامناً مع أنفسنا ومع أشقائنا المضربين في مصر…
دعونا نضرب في الأردن يوم 4-5-2008
إضراب عام عن العمل وعن الخروج من المنازل حتى الساعة 11:00 صباحا
لا حزبية ولا سياسية…شعبية شعبية شعبية
المطالب:
-أن تبذل الحكومة جهودا حقيقية للحد من ارتفاع الأسعار
2-تثبيت أسعار الغاز والكهرباء
3-وقف بيع ممتلكات الوطن
4-إنصاف موظفي القطاع الخاص ووضع ضوابط قانونية ملزمة للشركات لرفع رواتبهم
الطريقة:
مطلوب منا جميعا أن نمتنع عن الذهاب إلى العمل. دعونا لا نلتحق بأعمالنا في ذلك اليوم قبل الساعة 11 صباحا. لا ندعو إلى مظاهرات ولا اعتصامات، ولكن ندعو إلى شكل بسيط وسلمي وحضاري للتعبير عن القهر والظلم الذي يعيشه ما يزيد على 4 ملايين أردني على الأقل حسب الإحصائيات الرسمية. عمم هذه المجموعة على كل أصدقائك. وشارك في التعميم كذلك بالبريد الإلكتروني والمدونات والمنتديات وباستخدام رسائل الموبايل، وبكل وسيلة تخطر في بالك. وإذا وجدت فكرة جديدة للتعميم شارك المجموعة بها.
لا تخرج من بيتك قبل الساعة 11 صباحا يوم الإضراب. لا تقل لن ننجح: جرب أولا. لا تخف، فزمن الخوف انتهى. النتائج الكبيرة تبدأ من أفعال وأفكار صغيرة
إضراب شعب الأردن للمطالبة بحقوقه
لماذا الإضراب: للفت انتباه أولي الأمر
لماذا الإضراب فقط: لا نريد مشاكل امنية
لماذا الإضراب جزئي: حتى يتمكن الجميع من المشاركة
on 
on 
19 عدد التعليقات
at 10:55 am - 21st April 2008 Permalink
Public nudity would be more effective! lol. And we wouldnt lose productivity time. Let them make it in on a friday or after working hours!
at 12:26 pm - 21st April 2008 Permalink
صوتنا يعني بالك راح يكون مسموع !!!!؟؟؟؟؟
كله على الفاضي ………
بس عجبتني هاي :
(والنص التاني رح يستغل الفرصة ليعمل سياحة داخلية ورح تصير نسبة أشغال حجوزات فنادق العقبة 100%)
حلوة ….. بتعرف ليه يمكن الواحد صار بدو يعمل أي شي تا يهرب من الوضع ……….
at 1:56 pm - 21st April 2008 Permalink
هاي عادتنا. بنقلبها مسخرة علشان نلاقي مبرر وما نتحرك. بدل ما تتذمرو وترجعو تلومو الحكومة وقفو مسخرة وتحركو
at 11:48 pm - 21st April 2008 Permalink
الديمقراطية حاوى و الحكومة رح تسمح بهيك شغلة بس من ايدي اذا بتغير اشي
at 11:50 pm - 21st April 2008 Permalink
*حلوى (آسف)
at 12:51 pm - 22nd April 2008 Permalink
انا شفت الجروب اللي انعمل عشان الاضراب
انا بعترض على الاضراب مش لاني بدي اخبي راسي متل النعامة …لأ
انا بعترض لانه اول اشي مليكنا الملك عبد الله شايف حالنا ومش ساكت بيعمل اشياء كتييرة عشان يخفف عنا ولا بتنكروا…؟؟!!
تاني اشي
انتوا بدكم تعملوا اضراب علشان تضغطوا على الحكومة وتنزل الاسعار بالنهاية اذا نزلت الاسعار الحكومة مضطرة تدفع من خزينة الدولة عشان تعوض فرق الاسعار بيننا وبين السعر العاتلمي وانتوا عارفيين انه احنا بلدنا مش من الدول الغنية بالعكس ما بتحضروا اخبار وبتشوفوا قديش احنا مديونين
تذكروا انه حالنا احسن بكتيير من حال غيرنا وفكروا بشغلة اهم من الاكل والشرب والدخان اللي نص الناس قامت قيامتها لما سمعت انه راح يغلى
فكروا انكم عايشين في امان … ما اظن حد بينكر انه بلدنا من اكتر الدول الامنه في العالم بيكفي انك ممكن تنام وباب بيتك مفتوح وما تخاف وهاد اشي اهم من كل الماديات
فكروا بعقولكم فكروا انه ماشي في ناس نيتها التغيير بس برضه في ناس بتاخد من اللي بدو يصيير ذريعة لتحقيق اهداف ضدنا وضد منا واستقرارنا …شوفوا البلاد اللي حوالينا واشكروا الله على نعمة الحياة
اسفة للإطالة
at 1:01 pm - 22nd April 2008 Permalink
والله عين العقل
يا جماعة
انا مارح أعتبره مجرد حق مشروع
ولكنه واجب تجاه بلدي
وشعاري:
رح أضرب لو كنت لحالي
at 1:06 pm - 22nd April 2008 Permalink
عجبتني كلمة وين الواقعية
عفوا انت وين الواقعية بتقول (ممكن تنام وباب بيتك مفتوح وما تخاف ….)
اسف يمكن شكلك عايش في الرابية أو الغربية
وماعمرك رحت عوسط البلد
at 1:20 pm - 22nd April 2008 Permalink
ماتنكر انك عايش بامان لانه اذا بتنكر بتكون انسان غير صادق
انشالله عايش وين ما انت عايش
ما بتحس بالامان؟؟؟؟؟؟؟؟
بعدين لعلمك انا عايشة بالنزهة قوللي النزهة زي عمان الغربية
لو ناقشت باشي تاني احسنلك مش بتحاول تلاقي ثغرة تدخل منها مع انك عارف انا بالضبط شو كان قصدي من الجملة
at 1:37 pm - 22nd April 2008 Permalink
الحكومة مديونة لراسها..البلد كلها مديونة كمان!!
الاسعار عم ترتفع كلمالها في كل مكان بالعالم, بس الفرق انو بالدول الثانية بكون في ارتفاع رواتب مقابل ارتفاع الاسعار, الا بالاردن والاكم دولة الطفرانة الي حوالينا كمان
المظاهرة مش رح تكون مرخصة يعني رح تتوقف اكيد حسب خبرتي بالمظاهرات ايام ماكنت بالجامعة
على كل حال لو كنت بالاردن رح اشارك لو كنت فاضي عشان ما يحكو عني ابن فرير ومرتاح بالوظع الحالي بالاردن
بالامارات ارتفاع الاسعار ناااار زي الاردن بس الرواتب بترتفع وبتغطي ارتفاع الاسعار
بس يا عمي وين المقارنة, الامارات بلد نفط والاردن بلد طفر… مع اني بحب الاردن بس شو نعمل؟
بلادي وان جارت علي عزيزة وشكرا للموضوع اخوي
at 1:43 pm - 22nd April 2008 Permalink
الحمد لله انوا احنا عارفين وضع بلدنا المالي
يعني لما تشوف ابوك طفران وما معاه مصاري بتطلب منه يزيد مصروفك؟؟؟
واحنا بلدنا هي ابونا وامنا
واحنا عارفيين ….
يعني من وين تجيب الحكومة وتعطينا ….تبيع سمك البحر الميت وتوزع حقه على الناس بالتساوي
؟؟؟؟
at 1:59 pm - 22nd April 2008 Permalink
ما توقعت الموضوع يكبر للدرجة هاي انا
كلنا عارفين الوضع بالأردن, وانا لو أني عايش بره الأردن دايما على أطلاع على الأوضاع هناك..
سبب كتابتي عن الموضوع هو انه كل هالحكي مارح يفيد شي, سواء تم الاضراب بترخيص ام لا, سواء أن تم “توصيل أصواتنا” للحكومة أم لا… الوضع الأقتصادي 1+1=0 .. يعني مكانك قف
مش القصد تثبيط معنويات!! ولكن هاي مش أول مسيرة أو أضراب او مظاهرة بتصير لنفس الموضوع..
بحكوا أنه اكتشفو كم برميل نفط بالأردن… أدعوا انه نصير دولة نفطية
at 2:07 pm - 22nd April 2008 Permalink
لمشكلة انه اللي قاعدين بينظموا للإضراب عارفين ومتأكدين انه حال البلد اصلا تعبان وانه بلدنا اصلا فقير بس خلص بدهم يعملو اشي اكيد راح تصيير من وراه كتيير مشاكل
خصوصا من الناس اللي بتحب تصطاد بالمية العكره
وبعدين قاعدين بيقارنو وضعنا بوضع مصر
شوفوا الفرق بين البلدين مصر ام الدنيا وام الثروات يعني لو يوقفوا اهلها ايد واحدة بيقدروا يغيروا من وضعهم
بس احن بلدنا والله فقير واحنا اعلم بحالوا
at 2:24 pm - 22nd April 2008 Permalink
وين الواقعية: طيب والحل؟؟ نضل نندب حظنا ونعطي مبررات أنه أحنا بلد فقير أو بالأصح طفران
at 2:34 pm - 22nd April 2008 Permalink
لأ بس الواحد منا بيحاول وبيعمل على تحسين وضعه انا مثلا كنت ست بيت وما بشتغل بس هلأ اشتغلت وحسنت من وضعي اشي بسيط…. الظروف حكمت بس برضه سعيت
وانا ما بقول تقعد نندب حظنا
بسس برضه ما نمشي ورا حبال واهية ونضغط على ناس احنا عارفين تماما انهم مابيقدروا يغيروا
at 4:29 pm - 22nd April 2008 Permalink
عفوا يا وين
انا ماحكيت انه البلد لو طلعت برا البيت بتنخطف وللا بتنسرق
هذا حقنا عليها
وعفوا المصاري اللي بنعطيها للبلد وين بتروح والتجار الكبار الحرامية وين الرقابة
أكيد فيه مصلحة
يعني البلد لو مافي كبار وتجار حرمية والله بتعدل حالنا وبتوقف أسعار النفط لعند حدها اذا ساندت معنا في أسعارها
عشان هيك هذا الاضراب الغير سياسي وظيفته ان ينبه المسؤولين عن حالنا
وصدقوني لو مااطلعنا عمين رح يضرب ومين مارح يضرب
مارح نسوي اشي كل واحد يحكي انا بدي أضرب لو كنت لحالي وشوفوا النتيجة
واسف عالمعلومة الخطأ لمكان سكنك وأكيد حسيتي….لأني هناك
at 11:29 pm - 22nd April 2008 Permalink
يا جماعة الخير طولو بالكم,,,
بس حاب اعلق كم تعليق,,,
اولا الامارات بس ابو ظبي عندها بترول,, دبي ما عندها اشي معتمدة على حالها كليا بتجيب من مسقط و هي وضع شعبها مرتااااااااااااح ليش؟ و آمان عندهم!!!!
وضع البلد اقتصاديا ماكل هوا الشعب مش قادر يتنفس ما معاه مصااااري!!!! و كل هاد بعكس عالكل…لازم يصير حل هيك حراااام… لازم يصير اشي و منو للشعب المسكين كيف بدو يعيش بهناء؟
at 1:24 am - 23rd April 2008 Permalink
يا اخوان احنا عارفين انه الغلا ازمة عالمية. بس لازم الحكومة تصلح قانون الضرائب وتخفف ضريبة المبيعات. الإصلاح الضريبي لحاله بيجيب شي 500 مليون دينار سنوي. هاي دراسات مو حكي مجالس. هذول ال 500 مليون بيكفو لدعم الحاجات الأساسية للناس المعثرة، الكهربا والغاز والكاز والخبز. خلي الحكومة تدعمها وشوفو اذا الناس تحتج او تشكي
at 3:55 pm - 4th May 2008 Permalink
خاوا…
إضراب…
خاوا… يا بسس…
خاوا… يا خايفين…
خاوا…
Trackbacks & Pingbacks 1
[...] لموضوع “إضراب النشامى والرجالة” المقرر يوم 4/5/2008, كتير ناس علقوا علي لما حكيت أنه حجوزات [...]
أرسل تعليقاً