مدونة أسكدنيا

يا عيني على الشعب الأردني, رح يشبع بالفترة الجاية بيض وسكر وحليب وكل مشتقات الأبقار والخرفان من لحمة وكبدة وقلوب وخصاوي, وكمان رح يشبع أكل جاج, شايفين كيف الحكومة بتساهم بحل أرتفاع الأسعار؟
بس بالمقابل الحكومة حدقة أكتر من اللازم, ما بهون عليها تنزل الضريبة على شي بدون ما “تشل بخت” شغلات تانية بالضرايب وزيادة الأسعار.
في خبر نشر اليوم بجريدة الغد عن “رفع رسوم السجائر والتبغ المستوردة والكحوليات 70% و 150%“, ذكر الخبر أنه تم رفع الرسوم الجمركية على مستوردات التبغ بنسبة 70% لتصبح 150%, ورفع الرسوم الجمركية على الحكوليات بنسبة 150% لتصبح 200%, وذكر الخبر أيضاً انه تم زيادة الجمارك على الكاميرات واللواقط وغيرها من الكماليات.

يعني الخلاصة, البلد خايفة على مصلحة المواطن, بدها صحتو تضل منيحة, ما بدها أياه يدخن ولا يشرب, يعني بتحكيلو مادام أحنا رفعنا الجمارك عن الأكل وبنبيعوا بسعر الكلفة, ليش تنهم وتدخن وتشرب بيبسي طول الليل؟ الوضع مرتاح وكل ما تحس حالك مهموم أقليلك شوية كلاوي مع شوية خصاوي وضل كول لتشبع, ومافي داعي للدخان والبيبسي..

وكمان مابدها أياه يركب دش جديد عشان يجيب القمر الأوروبي لأنه تركيب دش جديد من شأنه أنه يبهدل صحة المواطن, لأنه رح يضل سهران طول الليل على القنوات اللي بتبث أفلام أكشن بالليل وبالتالي التأثير على قدرة المواطن على العطاء في اليوم التالي.. ولا ننسى الكاميرات كمان, أصلاً مين معاه يشم هوا هالأيام؟

بالنهاية كلمة لأصحاب مصانع الدخان اللي أعترضوا على القرار بأعتباره “جاحف” بحقهم ويعرضهم للخسائر, المواطن الأردني رح يضل يدخن حتى لو وصّل سعر باكيت الدخان 10 دنانير, يعني لا تخافوا, لأنه أحنا شعب بحرق كتير دخان, وإذا ما كان معاه فلوس ليشتري باكيت دخان رح يقضيها يشتري دخان “فرط”!