مدونة أسكدنيا

خصخصة مهرجان الأردن-جرش سابقاً

نشر في جريدة الغد اليوم مقالاً للكاتب جميل النمري بعنوان “3 ملاحظات”, شدّني الملاحظة الأخيرة حول مهرجان الأردن أو ما كان يسمى سابقاً بمهرجان الأردن بأنه هناك شركة فرنسية كبيرة رح تقوم بأدارة المهرجان لأنجاحة, لأنه كل شي بتديره الحكومة ولو كان بشكل غير مباشر مصيرو الفشل -على الأغلب-, فعشان هيك تم خصخصة المهرجان وتغيير أسمة.
بحسب ما ذكر الكاتب, فأن الشركة الفرنسية قد قامت بالتعاقد مع 16 مطرباً عبر الأنترنت بأجور أعلى بكثير من الأجور التي كانت تدفع لهم أيام مهرجان جرش طيب الله مثواه..!
الحلو بالموضوع أنه الشركة الفرنسية هي نفسها اللي توّلت ترتيب أحتفالات إسرائيل بالعيد الـ 60 “لأعلان دولة إسرائيل”.. والله ضربة معلم .. مالنا ومال الحكي, هيك الناس اللي بتشتغل صح!

بناء مفاعل نووي خلال 8 سنوات

هالخبر نشر في جريدة الغد اليوم, عن الأنتهاء من بناء أول مفاعل نووي “للأغراض السلمية” خلال 8 سنوات بالتعاون مع شركات عالمية مختصة بالطاقة النووية.

بصراحة أول ما قرأت العنوان حسيت بفرحة كبيرة, حكيت أخيراً رح نصير من الدول الـ 7 العظام قصدي الـ 8 بعد ما تنضاف الأردن لقائمة الدول “الأقوى” بالعالم, لكن تفاصيل الخبر كان مرّكز على أنه رح يكون المفاعل للأغراض السلمية, يعني حتى لو ولعت الدنيا, مفاعلنا حبيبنا رح ينتج كهربا وبس.. ههههه

بس الخبر فيو بشرى خير أنه الأردن تصير دولة بمستوى دول الخليج اللي فيها نفط, لأنه حسب ما ذكر بالخبر أنه سعر بيع كيلو الغرام من اليورانيوم بوّصل لـ 300 دولار تقريباً, بنطرح منها مربح الشركات اللي مساهمة مع الحكومة بالمشروع, رح يضللنا شوية حلوات  للبلد.

بس بعنوان الخبر الي على الصفحة الرئيسية لعدد جريدة الغد لليوم ذكر أنه رح يتم أغلاق 3 أماكن داخل المملكة,بس بالتفاصيل ما تم ذكر أسماء المناطق اللي رح يتم أغلاقها.. حابب أعرف انا بس , فضول مش أكتر.

نسيت أحكي أنه الحكومة رح تشارك بنصف تكاليف مناجم اليورانيوم (200 مليون دولار), رح تمولها من خلال بيع خام اليورانيوم اللي رح ينتج منه 2000 طن, لكن حاجة المفاعل النووي من اليورانيوم 40 طن بس, يعني الزيادة رح تترجع للبلد طبعاً مش لمكان تاني!
على كل حال, لو قصرّت الفلوس شوية مع الحكومة, بقترح أضافة ضريبة نووية على الشعب بمقدار 40% على الأكل والشرب والدخان وغيرو.. مش بدكم تصيروا دولة نووية؟؟ تحملوا معناتو .