اليوم كانت أول مرة بزور القنصلية الأردنية في دبي, كنت بالعادة أمر من جنبها دايماً, بس بعمري ما فكرت أدخل جواتها لأنه بالعادة ما بحتاجها الأ نادراً.
المهم, اليوم الصبح رحت مع صديق الي للقنصلية الأردنية عشان نجدد جواز سفرو, قعدنا جوا القنصلية حوالي ساعتين وشوي, طلعنا بخيبة أمل شديدة للوضع “المزري” للقنصلية وللعاملين فيها.
نيجي للتفاصيل, البداية كانت أول ما دخلنا على القنصلية, أول ما بتفوت عليها بتشم هوا بلادك, هوا دخان الفايسروي و LM والأنواع التانية اللي بدخنها الموظفين في السفارة, شكلو الموظفين مش حابين يحسّوا بالغربة لذلك بدخنوا نفس نوع الدخان اللي تلتين الشعب الأردني بحبو, ومش بعيد يكون مهرب من الأردن… ما علينا
لما تفوت على القنصلية بتحس حالك داخل على دائرة حكومية بالأردن, كل شي فوق بعض, مافي نظام…الخ من المشاهدات اللي متعودين عليها بمعظم الدوائر الحكومية, المهم, على يمينك مكتب أستقبال بخدم عليه موظف واحد فقط لا غير, وقدام المكتب في حوالي 30 واحد ويمكن أكتر شوي, العالم رح تدبح بعض, اللي بدو يشوف شو صار بمعاملة جوازو واللي بدو يشوف اذا طلعت الفيزا تبعتو أو لأ, واللي بدو رقم دور عشان يستنى مع العالم اللي تخللت من الصبح وهي بتستنى, والموظف يا دوب ملحق ع العالم, ونصيحة أنه ما حد يحاول “يستفسر” عن أي شي من كاونتر الأستقبال, لأنه الموظف مش فاضيلك ومشغول بعشرطعشر شغلة بنفس الوقت…
لفت نظري أنتظار فتاة على كاونتر الأستعلامات للأستعلام عن معاملتها, بعد فترة صارت تصرخ على الموظف وتحكيلو صرلي ساعه بستنى وفش أحترام لا لبنت ولا لحد, الموظف رد عليها وحكالها:أستني دورك؟ حكتلو وين الدور طيب؟ مارد عليها ,لأنه أساساً مافي دور, والموضوع بعتمد على دفاشة الشخص وقابلية الشخص اللي قدام أنه حد “يلزّق” فيو من ورا !!!
نيجي لرقم الدور, في بالقنصلية نظام الكتروني للدور, بس طبعاً معطل, فلذلك الموظف بكتب رقم تسلسلي بخط أيدو وبيعطيه للمراجع وبقلوا روح أستنى ع الكراسي.
نيجي للموظفين اللى على كاونتر المعاملات, في 4 موظفين فقط لا غير, وكل موظف فيهم مختص بشي واحد بس, الأول لأستلام معاملة تجديد الجوازات والهويات ..الخ, والتاني صندوق وطوابع, والتالت ماشفتو بعمل شي, والموظف الرابع مختص بتأشيرات الزيارة “الفيزا”, يعني ما الك الا تستنى دورك وأنت ساكت, وطبعاً الموظفين لما ينادوا على الأرقام, بنادوا بالعربي, وكأنو الكل بفهم عربي, أنا لاحظت أنه في كتير مراجعين للتأشيرات كانوا ضايعين, كل ما الموظف ينادي على رقم بسألو اللي جنبهم اذا هاد رقمي أو لا, هاد غير أنه أحد الموظفين فهمان الأنجليزي غلط, لما يجي واحد أجنبي يطلب منو فورم للفيزا, الموظف بسأله: شو جنسيتك ؟ المراجع الأجنبي بحكيلو WHAT?? برد الموظف يسألو كمان مرة:قلتلك وشّو (شدّة على حرف الشين) جنسيتك (مع نبرة صراخ)؟ برد الأجنبي بنفس الجواب, بعديها بكتشف الموظف أنه المراجع بحكيش عربي, بقلو “واطس يور ناشيونالطي”, بطريقة ما بفهمها الا اللي عايش بساحل العاج بس..!! وطبعاً معظم اللوائح والأرشادات بالعربي كمان, واللي بحكيش عربي ما ألو الا ياخد كورس عربي قبل ما يفكر يزور القنصلية.
النكتة أنه في صورة كبيرة للبترا في القنصلية, مكتوب تحتها صوّت للبترا للفوز بمسابقة عجائب الدنيا السبعة الجديدة عبر زيارتك للموقع الفلاني أو الأتصال على الارقام التالي *****… حسيت حالي بالسنة الماضية وقتيها..
النتيجة, القنصلية عبارة عن دور وأزمة وفوضى ومافي نظام واللي ما بعرف شو يعمل راحت عليه..
هاد مختصر عن تجربتي المريرة في القنصلية اليوم, وبتمنى هالحكي يوصل لأي مسؤول لحتى يتم أعادة النظر بمستوى الخدمات المقدم في القنصلية الأردنية وكمان السفارة اللي في أبو ظبي.
on 
on 
18 عدد التعليقات
at 5:51 pm - 15th June 2008 Permalink
اذا القنصليه الاردنيه في امريكا -هيوستن- عباره عن مزبله واللي بشتغلو فيها اولاد ما بتتجاوز اعمارهم 25 سنه بس طبعا اولاد ناس مدعومين .. واحنا بامريكا بندفع 250 دولار لتجديد جواز السفر … انا والله الي تجربه مع السفاره الاماراتيه في جبل عمان .. صحيح المبنى قديم شوي والطابع الواحد ب 20 دينار بس علاقل السفاره نضيفه وممنوع فيه التدخين والدور ماشي زي الساعه … ما علينا .. اصلا هاي البلد عمرو ما بصير فيها خير وزيارتك للسفاره هي رساله مشان تحمد الله انك طلعت من الاردن
at 10:59 am - 16th June 2008 Permalink
sorry, don’t have arabic letters
I had the exact same experience a few months back, i was shocked of how things were there. eshe be5ze
kont bede a3mel wakaleh o b2et astana ebn el 7lal men 9 lal sa3a 10 7ata sharaf, o lel asaf ma 7ada be3rf emta howe b7eb yeje 3l dawam, wazer Allah wakelak
at 12:23 pm - 19th June 2008 Permalink
شوف سيدي
الحكي كلو مش غريب بالمرة
وكلو طبيعي 100 بالمية وخالي من المواد الحافظة
ما علينا
يعني قبل كم يوم كنت مع صديق إلي بدو يعمل دفتر عيله
بتقدر تحكي 90 بالمية من الحكي إلي حكيته كان موجود
بالمكان إلي رحت عليه طبعا الاحوال المدنية في عمان
طبعا الشب زهق عيشتو
بالأخير . . .
رفع السماعة السلام عليكم كيفك خال ….
رد الزلمة : روح على الزلمة الفلاني ..
صاحبي : على راسي سيدي
ورحنا بأقل من 5 دقائق كانت المعاملة جاهزة
بالعربي نعم للواسطة لا للطابور
وغلي بدو أي معاملة على العنوان التالي
http://www.was6a.com
at 2:37 pm - 30th June 2008 Permalink
سليم,wonders,أحمد: شكرا لتعليكم
الفكرة اللي كنت بدي أوصلها أنه ليش هيك عم تتبهدل صورة الأردن بالسفارات اللي بره, وهي أنعكاس كامل للدوائر الحكومية اللي عنا بالبلد, والموضوع مش استهزاء أو شي تاني بقدر ماهو قهر على الوضع المزري …حبيت أوضح هالشي بسبب كثرة التعليقات المهينة اللي وصلتني على الموضوع..
وتحياتي
at 1:18 am - 12th September 2008 Permalink
هادول هني عربنا وين ما تروح بالدول المتقدمه بتلاقي الدور على رقم بطلعلك على الكمبيوتر يعني انا لما بدي اروح اجدد واو اعمل جواز سفري بتدخل بنظام وتفتيش امني طبعا وكل مسار بكون محدد لوين يعني اصدار هويه الها مسار اصدار جواز سفر الو مسار او لما تفوت بتكبس على النمره بطلعلك رقم وعلى هاد الاساس دورك يعني طلعلك رقم 40 دورك بطلع على الشاشه وبمشي الحال بسرعه وبتاخد الي بدك اياه بنظام وبحكو ليش العرب ما اتقدمو بشي اي بالله عليكو اتنجرو شوي من الشعوب التانيه ليش العب دايما غير عن كل العاك بكل شي ؟
at 2:06 pm - 31st December 2008 Permalink
السلا عليكم و رحمة الله وبركاته
وبعد
اني فتاة لقد كان طموحي ان اكون كابتن طياران زلكن فجأة في يوم من الايام اردت ان اكون قنصلة اردنية في دبي و ما زلت و سوف اكون ان شاء الله و الكل يناديني القنصلة صفاء وسوف ابدء السنة الجاي دراسة العوم السياسية وطموحي بأن ىاحسن جميع هذه امشاكل ان شاء الله طبعا يجب ان يكون لنا كل الاحترام للقنصلة الاردنية الان وله التوفيق ان شاء الله
at 5:48 pm - 18th April 2009 Permalink
انا رحت قبل شهر على القنصلية في دبي وصراحة كنت خايف ادخلها من اللي بسمعو عنها.. دخلت ولقيت عكس هيك.. مزبوط بدها ترتيب وبدها تغيير الاثاث يعني بدها شوية ديكورات عشان شكلها يصير يفتح النفس.. ومزبوط الموظفين بدخنوا بس انا ما بهتم بكل هالحكي انا بهتم بالمعاملة وبهتم انه يكون في دور وكل واحد عارف دوره.. كل واحد بسحب رقم وبقعد يستنى دوره والاحلى من هيك انه ما في زحمة ناس اصلا احنا كلنا كم اردني في دبي؟ استغربت من عدد الهنود في القنصلية كلهم جايين يعملوا فيزا
المهم انه الوضع ماشي عالدور ومعاملة الموظفين مقبولة نوعا ما يعني في شوية احترام للناس ولما رجعت استلم الجواز سحبت الرقم من هون وعلى طول ضوى عالشاشة لوول كان في بس شخصين في القنصلية الحمدلله انا ما بطيق الزحمة 
فالمهم انه الامور لقيتها مقبولة ولو انه لسة بدنا احسن من هيك والاهم انه لما تتصل بردوا عليك وبيجاوبوك 
at 12:24 pm - 24th May 2009 Permalink
لفكرة اللي كنت بدي أوصلها أنه ليش هيك عم تتبهدل صورة الأردن بالسفارات اللي بره, وهي أنعكاس كامل للدوائر الحكومية اللي عنا بالبلد, والموضوع مش استهزاء أو شي تاني بقدر ماهو قهر على الوضع المزري …حبيت أوضح هالشي بسبب كثرة التعليقات المهينة اللي وصلتني على الموضوع..
at 9:38 am - 12th July 2009 Permalink
انا مواطن اردني مقيم دولة الامارات العزيزة وقد راجعت القنصلية الاردنية في دبي حيث وجدت كل الاحترام والتقدير من جميع العملين في القنصلية واخص با لذكر سعادة القنصل السيدة (اريج الحوامدة ) والتي كانت مثالا للادب والاخلاق والتواضع واحترام الاخريين .
وهذة المعاملة تدل على اهتمام المسؤولين الذيين ينفذون توجيهات القائد والمعلم والاب (عبدالله ابن الحسين) اطال الله في عمره وجعله ذخرا للوطن والامة عاش الاردن عاش القائد
اخوكم محمد حمودة (اردني حر )
at 11:01 am - 22nd July 2009 Permalink
هادا كلام عار عن الصحه بالعكس كل احترام وتفدير ونظام داخل القنصليه الاردنيه وسهوله في الاجراءات ومكتب الاستاذه ريما مفتوح امام الجميع والحمدلله الشباب بساعدو الكل شكل البنت داخله على غير قنصليه
at 2:27 pm - 22nd July 2009 Permalink
يعني إلي بحكوا إنه فيه نظام صراحه كذابين، مع احترامي الشديد. يعني معروف في دبي إنه التدخين في الأماكن العامه و المغلقه ممنوع، كيف بعدهم بدخنوا، ما بحترموا البلد إلي همه فيه ؟؟ مش عيب الكلام هاد. الله يهديهم بس. بعدين مش عيب عليهم إنه بطلبوا منك 60 درهم علشان طابع ب 5 دنانير، بكم الدينار عندهم ؟؟؟؟. أنا صراحه بنصح أي واحد بدو يسافر على الأردن إنه بقعدلو كم ساعه في القنصليه علشان يتعود على الوضع إلي راح يروح عليه و بالذات عدم النظام، قذارة المكان، كشرة الوجه الي ما بتضحك للرغيف السخن . و دخلكوا ليش تجديد الجواز بدو 2-3 أشهر، مش حرام. ما في إنترنت ، فاكس، تكنولوجيا، بعدنا شغالين على الرسائل و الطوابع, مش عيب ؟؟؟
at 7:32 pm - 8th August 2009 Permalink
السلام عليكم و ثحية لكل الأردنيين النشامى , أنا أردني مقيم بالأمارات من سبع سنين , زرت القنصلية ب دبي عدة مرات , وبكل أسسسسسسسسف الوضع هتاك و الله مأساوي ؟؟!! من الأثاث للنظافة للدخان لمدة انجاز المعاملة للنظام للدور لأسلوب التعامل ….. الخ أنا بستغرب من القنصل أو المسؤلين بوزارة الخارجية ليش ما بعالجوا هيك أمور , و الله احنا الأردنيين بدبي اننا رافعين اسم البلد و بنعكس أحلى صورة عن أردننا الحبيب , لازم القنصلية تهتم فينا أكثر , لأنهم أصلا موجودين لرعاية مصالحنا . و أنا بتمنى من القنصل حل هالأمور. الأردن أإولا
at 10:50 pm - 18th August 2009 Permalink
انا بدي اسافر على الاردن سعودوني ارجوووكو طيف اسافر انا من غزة مابعرف شووو ممكن اذا بدكوو سعودوني هي اميلي بدي اكتبه اي وحد بسعدني اسافر على الاردن اجره عند ربه مش عنديms0591709@hotmail.com
at 7:35 pm - 19th August 2009 Permalink
انا مواطن اردني مقيم دولة الامارات العربيه المتحده ( الشارقه) وقد راجعت القنصلية الاردنية في دبي من اجل تصديق شهاده الجامعه حيث عند دخولي لبوابه القنصليه كنت خائفا من دخولها ولكن لقيت عكس ذلك وجدت كل الاحترام والتقدير من جميع العاملين في القنصلية واخص با لذكر السيد( ابو خالد) موظف التصديقات الذي ساعدني وكان متواضعا معي الى ابعد الحدود واتوجه بالشكر والتقدير له ولجميع موظفي القنصليه
at 2:26 am - 13th October 2009 Permalink
بتمنى انك ما توكون السيد ابو خالد بين قوسين…
at 3:17 pm - 27th October 2009 Permalink
شوفتهم بالدروب ولا حسرتهم بالقلوب
at 2:21 pm - 3rd November 2009 Permalink
الى المعلق رقم 1 ahmad
يمكن الحكي الي يحكيه صاحب المدونه او الي تحكيه حضرتك صحيح وانا بحكي يمكن لانه ما شفت القنصليه الاردنيه بدبي ولا شفتها بهيوستن وطبيعي اي شخص يكون عنده انطباعات من زيارته هناك سواء سلبيه او ايجابيه وهذا حكي ما بنختلف عليه لكن انك تحكي انه هاي البلد عمره ما يصير فيها خير فا اسمحلي .. البلد هاي من يوم يومها خير وخيرها الها ولغيرها لكن تعرف متى تحس انه ما فيها خير لما يكون حضرتك ما فيك خير لبلدك اذا هي بالاساس بلدك فطبيعي ما رح يكون فيها خير الك ويكفي والحمدلله نسبه الامان الي عايشين فيه هون اقلها لما تفوت سوبر ماركت ولا ستور بالليل ما بكون بينك وبين البياع حاجر من حديد او يكون عينه عليك وايده على مسدس تحت الدرج ..
اما بخصوص صاحب المدونه والي اتمنى انه يقراء تعليقي اولا مجهودك متعوب عليه ويستاهل الاحترام وانا من الامس وانا اقراء مواضيع مدونتك الي لقيتها بالصدفه لكن لفت انتباهي انه اغلب مواضيعك تقارن بين الاردن وبين دبي او الامارات بشكل عام وطبعا الكفه الارجح هي لدبي ( هذا الشي موجود بمقالاتك وبالواقع ) لكن مش لدرجه انه الاردن لاشيء بالمره .. انت خليت انه دبي هي المدينه الفاضله وخليت انه الاردن نقطه ببحر دبي لكن يا ترى سألت نفسك ايش موارد الاردن وايش موارد دبي ؟؟؟ ومع هيك في استثمارات بالاردن ومناطق نتجاوز فيها الكثير من البلدان … قارنت الاردن بسوريا او مصر؟؟ الي العسكري هناك ما عنده استعداد يتطلع بوجهك الا لما ترشيه .. قارنتها بالعراق الي صح من اكبر الدول المنتجه للنفط لكن معدومه الامان وبعد الساعه سته المغرب ما تقدر تطلع ولا تروح ولا تيجي .. .. في كثير من الدول باب المقارنه فيها مفتوح والنتيجه تكون طبعا للاردن وهذا مش لاني اردني بحكي هيك لا.. بس هذا الواقع .. صح في عنا سلبيات بالبلد لكن الحمدلله الايجابيات اكثر .. اتمنى انه تكون مدونتك ونقدك في سبيل الاصلاح والنقد البناء وما يكون هدفها هو اعطاء الصوره السلبيه للاردن كأنها الصوره الطاغيه والمسيطره على البلد واتمنى انه ما يكون هدف مدونتك هو لصق بالصفحات وتعبيه كلام يمكن يكون مضحك لكنه بالتالي كلام
احترامي لك ولمدونتك واتمنى انه ما يكون كلامي ازعجك واي باب للنقاش انا جاهز
at 8:57 pm - 22nd February 2010 Permalink
اتمنى ان يكون الموظف الاردني في اي موقع مثالا لكل موظفين العالم عملا وذوقا واخلاقا وهكذا اكتسب ابناء الاردن في الدول العربية سمعة طيبة في عملهم بالقطاع الخاص ويشهد لهم الجميع باخلاصهم وصدقهم وبشاشتهم وحسن تعاملهم
واتمنى ان يكون ذلك في كل المواقع التي يعملون بها حتى نحافظ على سمعة الاردن وتميز ادب اهله بالتعامل بين بعضهم ومع غيرهم
انني خلال عملي بالخليج ثلاثون عاما لم اجد يوما معاملة لائقة على الحدود الا في العام الماضي حيث منذ دخولي المنفذ حتى مغادرة دائرة الحدود بالكامل وانا اتمتع بحسن المعاملة وطيب الاستقبال والوداع فتمنيت ان يكون كل موقع في الاردن مثل منفذ حدود العمري
وقبل ذلك كنا نستقبل في الحدود وكأننا مطلوبين وتم استسلامنا واحيانا كأننا مكروهين وكنا نعاني الامرين حتى تنتهي اجراءتنا ونتمنى ان لا نعود لرحلة العذاب مرة اخرى
لازلت اشكر وادعو لذلك الشاب الاردني النشمي الذي نظر في وجهي وقدر انني قطعت مسافات طويلة حتى وصلت اليه فقال لي عمو ممكن ترتاح عالكرسي وتعطيني معاملتك
وفي دقائق انهى هو وزملاؤه معاملتي فعاد لي باسما تفضل يا عمي بأمان الله جاهز هاهو مثال الشباب الاردنيون هاهم ابناء مدرسة عبدالله الثاني ابن الحسين رعاه اللهورحم والدنا الحسين
كونو هكذا ايها الاردنيون
ولكم احترامي ولكم محبتي ولي بكم الفخر الى الابد
وكل التقدير والاحترام والحب لقائد الوطن
أرسل تعليقاً