عوافي…
اليوم وأنا بدوّر في أرشيف الصور اللي عندي, لاقيت صور الها ذكرى جميلة جداً عندي, هالصور كانت في مقهى زرتو أنا وصديقي أسامة الرمح بسنة 2006 .
فبينما كنت انا وأسامة نتسكع في حواري دبي .. وفي الزقق .. لاقينا -بمحض الصدفة- محل مخفي بين هالزقق هاي.. المحل طوله متر بمتر.. بعد ما دققنا ومحصنا وبحصنا النظر عشان نعرف شو هو.. طلع هادا المحل قهوة..
هاي القهوة يرتادها العشاق والحبيبه وصفوة المجتمع في دبي ورجال الأعمال تبعون الأبراج في شارع الشيخ زايد.. هؤلاء من زهقوا من صخب الحياه ومللها وروتينها..
مالنا وما طولة السيرة.. القهوة هاي فيها كل أشكال المجتمع المرموق في منطقة نايف والحواري المجاورة لها..
ما يغركم الأشكال اللي رح تشوفوها هلأ… كلهم ماخدين أجازة من الحياه .. بتعبير آخر كلهم عاطلين عن الأمل .. بايعينها… وبصحتكم…
طبعاً دخلت انا وأسامة وأرجلنا أرجيلة تمباك عجمي أيراني أصيل هادا اللي النفس منو بخليك بعالم سبيس تون.. طبعاً مارح أحط صورنا
خليكم مع الصور… ومع تعليقي…
هاد منقل الفحم.. بعملو عليه أطيب شاي.. الكاسة بدرهم.. شربت كاسة انا واسامة.. والله منيحة .. خوش شاي عيني :sleep:
هاي المجلى.. أنظف من هيك عبث.. هون بغسلو الشيشه…
هدول هم الشيش تبعون الأرجيلة التمباك.. أحنا أرجلنا منهم :loved:
واحد من رواد المقهى العاطلين عن الأمل.. ما يغركم شكلو.. هادا عنده 5 مكاتب في برج دبي رح يستلهم قبل ما يموت بشهر:henno:
صورة أقرب اله وهو في حالة غوصان روحاني في بحر الأفكار ومحيط المال والأعمال وبانيو الشركات وخزّان الحشيش:smoke:
الحاج أبو مش عارف شو .. أيراني .. هادا صاحب القهوة .. سنانو وقعوا ايام العدوان الثلاثي على مصر.. وفي قول آخر أيام حرب الشلاليط :haha:
وأخيراً نظره عامة على المحل وفيها صاحب المحل الأيراني وكل الأراجيل والشيش مبينه … طبعا الرجل الي على اليسار رجلي انا :loved:
بالنهاية أرجلنا ولف راسنا وروحنا ع البيت …
الى اللقاء مع شيشة تانية..
رأيكم
on 
on 
9 عدد التعليقات
at 10:43 am - 18th June 2008 Permalink
يا الله.. شو انها كانت ايام هَنا مع انها ايام صعبة
آي مِس يو ماي فريند.. لايك هيل
at 10:47 am - 18th June 2008 Permalink
خالص رسمي
بس شكلو الوضع فياعة لأبو موزة
أكيد عرفتو
المهم سجل المكان والزمان .. شكلو إلو زيارة يابا
على راسي يا تمبكجي
at 4:39 pm - 18th June 2008 Permalink
والله عنجد صحيح….
عن نفسي بحب الاماكن الشعبية جدا…وعلى راسها مطعم هاشم في البلد…
هاد يا معلم..صحن حمص وكم حبة فلافل محشيين وملعقتين شطة اي والله احسن من احسن مطعم في الاردن… لا سلام سلم … وبعدها نفس ارجيله بـ جفرا… وضعك لوز….
والله صور رائعة…
واحسن شيئ : ||فبينما كنت انا وأسامة نتسكع في حواري دبي .. وفي الزقق||
خخخخخخخخخ
ذكرتني بايام التسكع بجانب قهوة الاسمر عند مدينة ملاهي الجبيهة…
الله يسعدك ويوفقك عمور..
تحياتي
at 6:01 pm - 18th June 2008 Permalink
أسامة: فعلا كانت ايام اكتر من رائعه.. على الرغم من كل المشاكل.. لهلا راس التمباك بلف براسي ههههههههه
سليم: تعال وبعزمك عليه.. ماعندكم منو بالسعودية هاد
محمد: اخ بس.. زكرتني بهاشم, انا الاسبوع الجاي بكون بعمان, بدي انزل على هاشم بوسط البلد اسلخ صحن حمص وفول,, ولو انه اخر مرة نزلت عندو من 5 شهور ما عجبني بالمرة شغلة ولا النظافة الي عندو, بس يا اخي بضل مميز .. يسلمو حبيبي ع الرد
at 12:00 pm - 24th June 2008 Permalink
يا عيني على راس معسل مع قهوة و شاي
مرات بحكي لحالي
معقول ييجي يوم بعد 20 سنة و اشتاق لليوم اللي انا فيه
at 5:36 am - 7th August 2008 Permalink
بس وين الصور بالزبط؟؟؟
at 3:37 pm - 31st October 2008 Permalink
الصور بتجنن اكيد انت الي صورتها
بس لما اشوفها بحكيلك رايي بصراحه
at 6:38 pm - 19th November 2008 Permalink
يا عامر وين الصور ممكن تفرجيني الصور رجاء!!!!
at 6:43 pm - 19th November 2008 Permalink
مياسي: للأسف الصور نمسحوا من السيرفر..لكن لو قدرت اجيبهم مرة تانية رح احملهم ان شالله
أرسل تعليقاً