مبارح كنت قاعد مع الشباب بنحضر مباراة أسبانيا والمانيا في نهائيات كأس أوروبا, بعد ما خلصنا كنّا كتير جوعانين, المهم جزء من الشباب بدهم ياكلو في بوبايز وجزء تاني بدهم ياكلو بيتزا هت, فقررنا نروح على شارع المدينة المنوّرة وكل واحد يطلب اللي بدو اياه وبالآخر نقعد على طاولة وحدة, لأنه المطعمين جنب بعض وبنفس المبنى.
اللي بدو بيتزا راح قعد وطلب, وانا وكم واحد رحنا على بوبايز وطلبنا أكل, حكولنا أستنوا ربع ساعه, سألت الموظف لو أخدت الوجبة معاي على البيتزا وأكلتها مع الشباب عادي؟ حكالي آه مافيها مشكلة.
أخدنا وجباتنا ورحنا على البيتزا هت, أول ما الموظف اللي هناك شاف وجبات البوبايز معانا, حكالنا “معلش حضرتك ده البوبايز ممنوع هِنا”.. حكتلو ليش يخوي؟؟ هو أحنا جايبين معانا سلاح؟ رح نادالي الـ Supervisor , اجى لعندي وبحكيلي معاك فلان الفلاني Supervisor المطعم, طبعاً كان يحكي بلهجة هجومية نوعاً ما, وصار يحكي ممنوع وجبات البوبايز هون بالمطعم, حكتلو ليش شو المشكلة يعني؟ المطعمين جنب بعض وصحبانا بدهم ياكلوا من عندكم وأحنا بدنا نقعد معاهم؟ حكالي ممنوع, حكتلو شو الجريمة؟؟ رد علي أنه الجريمة بالموضوع أنه أحنا شركة وهم شركة تانية, حكتلوا واذا يعني؟ بلشت لهجتو تعلى مع الوقت وانا بلشت أتنح, حكتلو طيب بصير خير, ورحت على الـ Supervisor الي بمطعم بوبايز, وحكتلو الي صار, حكالي بالعادة بسمحوا أنه وجبات بوبايز تدخل هناك, بس شكلو بدو “ينكش مخو” علينا, المهم أجى الشب معاي على مطعم بوبايز وحكالي أنه احكي أنه Supervisor مطعم بوبايز بكون أبن خالتي
يعني واسطة, وفتت انا وياه على البيتزا هت, حكالو ليش هيك يا زلمة بتعمل بأبن خالتي, الـ Supervisor بالبيتزا هت صار يضحك وحكالي تفضل عادي..
يعني حتى بالمطاعم لازم فيتامين واو يشتغل
on 
on 
8 عدد التعليقات
at 2:08 pm - 30th June 2008 Permalink
غريب
مع انه التنين تابعين لنفس الشركة
يعني هنن اسمين مختلفين بس الراس الكبير واحد و الإدارة وحدة 
و حتى المبنى
ما كان بدها واو
, كان بدها واحد يقول بتتخوت و انتو التنين واحد !!
at 2:22 pm - 30th June 2008 Permalink
قباني: ليش فكرك ما سالتهم؟؟ حكالي بيتزا هت لامريكانا وبوبايز لشركة تانية اسمها الدحلة.. يعني انه مبنى واحد بس الشركة مختلفة..
at 5:12 pm - 30th June 2008 Permalink
هلئ لو كانت الشغلة الها علاقة بحمص هاشم وفول ابو جبارة كنت حكيت ماشي…
اما بيتزا هت و البوبايز مش راكبة يا رجل…
وبعدين ما دام في واسطة فلا تخاف….كلو بمشي في هالبلد..
at 3:05 pm - 10th August 2008 Permalink
اكتر شي بيضحك بالموضوع انك بلشت اتنح
at 5:17 pm - 30th October 2008 Permalink
شافوكو طنطات ونكشو مخاتهم عليكم
at 2:19 pm - 13th May 2009 Permalink
انا كنت مساعد مدير بمطاعم بوبايز ومش شايف في مشكلة لو اخد وجته على البيتزا
at 12:39 am - 7th August 2009 Permalink
شكرا لك مشكور
at 2:28 pm - 21st October 2009 Permalink
على كل حال … الإثنين صار اكلهم زي الزفت .. كانوا أول والله اكلهم مرتب ومميز…بس هلأ صارت خدمتهم كمان زفت وماصاروا يهتموا بالنظافة ,,,,وحتى العروض الي بعملوها صار فيها خداع للناس خاصة شغلة الكوبونات….والله وش عارف شو صارلهم…..وحتى kfc كمان بطل زاكي…. الي بيعرف شو القصة يخبرنا….
أرسل تعليقاً