اليوم ركبت مع شوفير تكسي أكل راسي قد ما صار يسولف مواضيع “خرّطي”, المشوار كان طويل نوعاً ما (من الدوّار السابع لشارع الجامعة الأردنية), ما صدقت على الله أنه أوصل.
بأختصار, دار بينّا الحديث التالي بمجرد أنه الشوفير شاف بنتين فلبينيات قطعوا الشارع.
الشوفير:يا عمي والله الفلابنة (قصدو الفلبينية) ألهم جمال رباني بخوث خوث.
أنا:يا زلمة شو بتقول؟ مش لهدرجة, بضل الجمال الوطني الو نكهة خاصة.
الشوفير:يا حبيبي الجمال الفلبيني الو نكهة جميلة جداً (مع شدّ على حرف الجيم).
أنا:شو المميز فيهم؟ بشوف عنيهم ممغوطات زي الصواينة (جمع صيني).
الشوفير:انا تعرفت على 4 بنات فلبينيات من الآخر, “بشلـgـوا شلـg”.
أنا (بقرف شديد ومغص كمان): وين تعرفت عليهم؟
الشوفير:والله هظيك المرة كنت واقف عند الدوار السابع, لاقيت 4 بنات بحاولوا يوقفوا تكسي, ولا تكسي راظي يوقفهم, انا حكيت لحالي خليني أشوف وين رايحات البنات, ماكذبت خبر ورحت لعندهم ووقفت, حكتلهم لوين رايحات انتوا؟
أنا قاطعتو: ليش أنت بتحكي أنجليزي؟
الشوفير:محسوبك “ببرطم” شوية أنجليزي.
أنا (بنظرة كونان): صادق, بس كمل.
الشوفير:حكولي على الـ Dead Sea ,حكتلهم كم تدفعوا؟ حكولي 15 دينار, حكيت ببالي يلعن ****, بس 15 مش معقول, وطلبت 20 دينار انا, وهم ما رضيوا.
أنا:بس مش 20 دينار كتير؟
الشوفير:شو عرفك أنت, أصلاً هظولا اللي بدفعوا.
أنا:طيب وبعدين؟
الشوفير:ما الك بطولة السيرة, قبلت بـ 15 دينار انا, بس قررت أنه أشل عرظهم وأطلع الفرقية.
أنا (بدعي الله أنه أوصل بسرعة) :وبعدين طيب؟
الشوفير:وانا بالطريق, سألتهم معاكم مايوهات يا حلوات؟ قالولي لأ, حكتلهم بعرف محل ببيع أواعي بحر مرتبات, حكولوا خدنا عليه, وطبعاً اخذتهم هناك ليشتروا مايوهات, وطبعاً حق المايوه 6 دينار, خليت صاحب المحل يسلخهم المايوه ب 10 دنانير, يعني ظحكت عليهم ب 4 دنانير, يعني أخذت 16 دينار زيادة.
أنا:لا والله حدق, وبعدين؟
الشوفير:قبل ما نوصل البحر الميت, سألتهم أذا جوعانات؟ حكولي آه, أخذتهم على مطعم, وأكلوا وأخذت على كل راس دينارين زيادة, يعني 8 دنانير لجيبتي فوق حق أكلهم.
أنا (بنظرة قرف): طيب مش حرام عليك؟
الشوفير:أي هظول سياح, معاهم فلوس عفق (كثير بلغة الديونجية).
أنا:طيب؟
الشوفير:بعدين وصلتهم على البحر, ونزلت معاهم عشان أعلمهم السباحة, لأنه محسوبك كان سمكة بزمناتو, وبلشت أعلمهم السباحة وشغلات أخرى و و و و ******.
أنا (قبل ما يكمل القصة و يحبّلهم): يعطيك العافية بدي أنزل هون.
الشوفير:يا سيدي حبيت أكمل القصة بس شكلك معجوق.
أنا:وانا كان بوّدي أسمع بقية القصة, بس يالله خيرها بغيرها,, ونزلت من التكسي مع أبتسامة مسـgــعة أنه خلصت من قرفو.
لو بركب كل يوم تكسي, كان مليت المدونة قصص دواوين التكاسي, على كل حال, تزكرت اليوم تكاسي دبي, الشوفير (لو ماكان عربي) ما بحكي معاك ولا كلمة, بسوق بأحترامو, ومش مستعد يسّمع الراكب قصصو الطرمة زي شوفريتنا الأشاوس…!
وسلامة خيركم.
on 
25 عدد التعليقات
at 3:00 am - 6th July 2008 Permalink
loooooool
kol shofeyt el takasi zo3ran.. ana lma araw7 m3 ay taxi banjan 2ad ma be7ko m3ay sh’3lat kolha kezeb
at 3:31 am - 6th July 2008 Permalink
هههههههههههههههههههههه
يا اخي و الله قصة غريبة وعجيبة…صدقني لو كنت راكب تكسي وحكالي اياها الشوفير كنت رح افرط ضحك…مش رح اقدر اثبت حالي….
انا مش عارف كيف تحملت ثقالة هالدم هاي….
وبعدين ما احنا الصنف الوطني زهقنا منو e ^ …بدنا نلحق الفلبينيات ؟؟؟
at 3:49 am - 6th July 2008 Permalink
هههههههههه
ما انا ماشي معاه من الزهق
بعدين انا جاي من بلاد الفرنجة, يعني مشتاق للصنف الوطني لأنه تعودنا على الهنود والفلابنة هناك
at 4:06 am - 6th July 2008 Permalink
2s2laa 3ala txaasii AD w Dubai !!..
bs bte3raf .. a7san shi te3ml 7alk bte7ky phone tol 2l tare2
7ata law ma 3m te7ky m3 7ada w ma m3k credit
bs 23ml 7alk bte7ky
aw put on ur ipod or any music player
w kman bte5las mn 7akawehom 2lly ma 2lha da3y!
well, tsaletlak shway anywayz
at 12:56 pm - 6th July 2008 Permalink
ko ma staka ??? mabooty
lol… yel3an elli nafadhom sho bakrahom
at 1:17 pm - 6th July 2008 Permalink
Shoshana: next time bdy a3mel 7ali saye7 ma b3rf a7ki 3arabi wla english 3shan a5las men Garafhom.. garaf ele ygrfhom sho momleen
n.b: i visit ur site, but i am not able to post a comment by firefox, the mouse disappear when i move it near add comment, then i use IE
حمودة: maganda
and Atteh
hay kam kelme kman in Tagalog language
at 2:15 pm - 6th July 2008 Permalink
انا قرأت اكتر من مدونة الك
لاحظت انه كتير عمالك تقارن دبي بالادرن
من ناحية التصرفات و التحضر و اشياء كتيرة
بس حابة احكيلك انه كل بلد حر ب حاله
طبعا صاحب التكسي ما رح يحكي معك ب دبي لانه عبارة عن الة هندية و لا باكستانية بتشتغل ع تكسي
و شغلة تانية قديش ممكن الاردن تكون بنظرك فيها اشياء مش حابها بس فكر لما تاخد كل نفس انك بتاخد نفس طبيعي بدون اشي اسمه كوندشن او نفس ملييييييييييييييء بالرطوبة الخانقة
يكفي انك بتشوفش هندي او عل الاقل لو فيه نسبة فساد اخلاقي بس مش منتشر ب كل مكان زي دبي
بس حبيت اعلق هاد التعليق
ع فكرة ما حدن ضربك ع ايدك تيجي اجازة عل الاردن كان مضيتها بربوع دبي الخضرا قصدي….الصحراء
at 2:28 pm - 6th July 2008 Permalink
مش عارفة:
شكراً أخي/أختي الكريمة على ردك.
بداية, يجب أن تعلمي أني من مواليد الأردن, تربيت وعشت على هذا التراب,أحببت هذا البلد بكل ما للكلمة من معنى.
ما أردت أيصاله في مدونتي هذه, عبارة عن نقد للجوانب السلبية في حياتنا اليومية في الأردن, أي نقد من أجل الرقي بالبلد, وليس من لأجل النقد فحسب.
مقارنتي للأردن بدبي, ليس نقصاً من قيمة الأردن طبعاً, ولكن هنالك الكثير من الأمور التي أراها (حسب وجهة نظري) أفضل في دبي, وأتمنى لبلدي أن يحذوا حذوها ويطبقها.
طبعا ليس لأن دبي في نظري هي المدينة الفاضلة, بالتأكيد لا.. ولكن دبي هي المدينة الوحيدة التي عشت بها فترة طويلة بعد الأردن, فلذلك أقوم بالمقارنة “أجمالاً”..
لدينا هنا العديد من الأمور التي تحسب للأردن, وهي أفضل بكثير من دبي أو غيرها من البلدان, ولكن في موقعي هذا أحببت التركيز على الجوانب السلبية, عسى أن يمر مسئولاً يوماً ما ويقرأ ما أكتب...gif)
وشكرا على ردك
at 5:16 pm - 6th July 2008 Permalink
يا عمي والله انا بنبسط على قصص الشوفير على القليله بتضحك شوي وبتعمل جو بس شكلك هاااااي وبتحب تعمل ريلاكس بتكسي بنصحك المره الجاي تطلع بباص ما حد بوكل راسك وعجبني كلامك انو بكل كلمه بتحط لغه دوااوين لا يا مااان هااد كلام الشعب الاردني كلو مش دوااوين وغيرو وانا شايف انك مبالغ بالقصه والسايق اردني منا وفينا لهيك بحكي معك ومشاكلو من مشاكلنا بس بدبي السايق من بلد تاانيه وجاي ليجمع كم قرش ويروح واصلا ما حج بفتحلو مجال ليحي وازا حكى شو بدو يحكي ما هو هندي فأحمد ربك انك اردني واتنمى عيش بالهبلد وارضى بلي فيها يلي عنا مش عند غيرنا قلبي
at 12:04 am - 7th July 2008 Permalink
انا مغترب خارج الاردن وبستغرب لما بشوف حد بنتقد شوفير التاكسي او غيره !
نفسي اطلع مع شفير تاكسي واسمع هاي القصص مع انه انا مش ملزم اصدقها
at 12:53 am - 7th July 2008 Permalink
لوووووول …….
أنا كمان شوي بألف كتاب رزان و التكاسي …..!!! هيييي …
من كتر ما صارت معي مواقف ……إلي بينزلني و إلي طريقه مش ع طريقي و إلي بيقزلي الله يعوض عليكي !!!! كأني بشحد ……
…
ع فكرة مقالاتك من الواقع ……
و حلوة .. و طريقة عرضك للموضوع بيجذب القارئ
at 2:20 pm - 7th July 2008 Permalink
Vagueraz: بالاخر بحكيلك شوفير التكسي بعكس هموم المواطن
بتنوري الموقع واهلا وسهلا فيكي دايما
at 5:27 pm - 9th July 2008 Permalink
كويس عندك صبر وتحملتو
at 9:57 pm - 11th July 2008 Permalink
شكلو “السايق” متأثر بـ “مهند” تبع مسلسل نور
at 10:00 pm - 11th July 2008 Permalink
رد على تعليق اللي “مش عارفة” اسمها.
ما دام ميزان حرارة الوطنية عندك واصل 100 ليش بتحكي لبناني ؟ “حدن”
at 7:14 am - 12th July 2008 Permalink
هههههههههههههههههه و الله يـآ اسكي انه مدوناتك انت و اسامة جناان ..
و هالشي بصير ،، هاد لو شب طلع بصير قصص زي هيك، شكلي بدي اعمل مدونة خاصة لشوفيرية التكاسي بعمان عن الـ 3 شهور اللي قضيتهم بربوع عمان .. اشي بقـرف ..
و بالنسبة لـ “مش عارفة”،،،
حبيبتي الواحد بينقد لهدف معين مو مشان النقد و بس،، و اللي متلك هم اللي بيكبروا نسبة التخلف في البلد، المواطن لازم يحكي عن مشاكله و عن اللي شايفه صح، و لو البلد كتير ديموقراطية، لازم تتقبل النقد، و تسعى على تسكير الثغرات اللي موجودة فيها..
عموما كل واحد اله رأيه و ما رح تقدري تمشي الدنيا كلها على رأيك ..
أسكـي،،
تابع تدوينك، لانه اسلوبك حلو و بوصل للقلب بسرعى
at 2:47 am - 13th July 2008 Permalink
ya e5wan mn youm ma be3et hal seyara 7ayate t3′ayarat walah batalet a3raf 7ali..maradony
(((
at 1:04 pm - 13th July 2008 Permalink
HAHAHA!
at 1:37 pm - 13th July 2008 Permalink
ممممممممممممم
مشكور على هاي القصة , بس الأحلى من هيك إنة خيالك واسع ,,,,,
ننتظر المزيد من القصص المشوقة ,,,,
at 11:59 pm - 13th July 2008 Permalink
يا استاذ ما بعرف ليش حاقد هيك على هالمساكين (شوفير التكسي ) الزلمة شكله كان مخنوق من مرته الليلة اللي فاتت قبل طلعتك معه و حب يعرط شوي شو فيها و الواحد منهم بتلقاه مصطوح قلبه من اللف بالسيارة من صباحية ربنا و ماحدا معبرو بكلمة و شافك شب غانم حب يدردش معك و يفرد مهاراته بالديونه و الفهلوة
و بشكل عام السواقين الاردنيين مشهوريين بلسانهم السليط و المديون (بتشديد الواو ) بس مع هيك قلوبهم طيبة و نشامى
و هالقصص اللي بتسمعها منهم اعتبرك فلم هندي بتتسلى فيه لحد ما تصل مشوارك بالسلامة
و شكرا
شادي رواشدة
at 8:36 am - 14th July 2008 Permalink
dear أسامة الرمح، who told you that we in jordan use have one accent? i’m actualy from around amman and i speak in a different accent from people who live 10 miles from me.
at 7:24 pm - 14th July 2008 Permalink
متى نتعامل مع سياحنا بلاطفة وبعيدا عن الطمع ، لقد قابلن الكثير من الاجانب ويتكلمون بمرارة عن سواقين التكاسي بالاردن ، يا جماعة شئ يندي له الجبين . لازم يكون في رقابة صارمة عليهم من حيث اللباس واللباقة واحترام الزائر وذلك باعطائهم دورات ارشادية ، الاردن يا جماعة بلد فقير يعني احنا عايشين تقريبا من خير امريكا والدول الاوروبية وموارد طبيعية زي جيرانا العرب ما في فيجب ان نقف وقفة رجل واحد من اجل تطوير وازدهار قطاع السياحة لدينا ، انا كنت بشرم الشيخ قبل سنة وشوفت تعامل الناس هناك .
at 1:39 am - 24th August 2008 Permalink
لو انا كان كسرتله وجهة وترفشت ببطنه لانه صار الحرامي يتباهى بحالو والزاني يتباهى بحالو كانه عامل اشي حلو
يعني شفير التكسي ما عمل حساب انو عندوا خوات
لعنت الله عليه شو وقح
at 5:47 am - 28th October 2008 Permalink
السلام عليكم
يعطيك العافيه على هالموضوع و بعرف انو صباح الخير و بدري على ردي بس لما قرأت ما قدرت الا اعلق
اول اشي والله حكيك 100 100 زمعايشينه كل يوم
طبعا شفيرالتكسي مش جاي من كوكب تاني و ياما منهم متعلمين و مثقفين بس للأسف الغالب عنا هون ……. سلامتك و تعيش يعني لو كان واحد منيح فيهم و محترم الباقي يا باكلوه يا بخربو بيته و بقطعو رزقه فبالتالي عشان يعيش لازم يصير زيهم
و لأي حدا بدافع عن القصه الي صارت فوق للشب اولا تخيل مستوى تفكير الشفير الي انتا راكب معه بترضى حد من اهلك و من عرضك يكون بمكان زي السياره مع واحد تفكيرو زي الحلو الي فوق
وتعليقي للصيبه اذا الفلابنه و هيك عامل معهم كيف لما يشوف بنت اموره نفس سنحته انا لحد الان ما طلعت بتكسي و كان في بنت بالشارع الا ما يطقس(يرمي حكي) عليها و انتي ادرا و الباقي عندك …
طبعا للمعلوميه بس انا كنت متغرب بالزمانات (خاروف) و حاليا مقيم(مقلع) فا بعين الله
at 4:14 pm - 18th November 2008 Permalink
انا متأكد انك طلعت بالتكسي و كان سردك للقصة كما لو كنت انا اللي بقرأ فعلا راكب بالتكسي بس ان خبصتها بالاخير و صرت زي صاحبنا شفير التكسي تعرف ليش ؟لما حكيت انك كنت بدبي و التكسي بسوق بإحترام
يا صاحبي اولا ازا التكسي بتكرم عليك و بوقف الك بكون منيح و لما تركب معا ببلش الخناقة مثلا احكيلو روح على بر دبي المسا و شوف الاحترام تبعهم ولا انك طالع لشارع جمال عبد الناصر بالليل “طبعا بالشارقة ” شو ازا بركبك و يا سلام لما تركب مع شفير هندي طربان و مشغل الاغاني الهندية و مشوارك طويل. احكيلك الله يخلي النا شوفيرية الاردن اقل ما فيها بسمعونا حكي عربي مش مصطلحات زي “سير” معناها تابع الحركة او “بنط” يعني وقف هون او “جلدة “بمعنى اسرع و ما ادراك ما معنى كلمة “جلدة ” لازم بس تقرأو تعليقي هاد تروح تعملو حملة وطنية بالاردن لمساندة الشوفير الاردني و تلغو عيد العمال و تخلو عيد الشوفير
أرسل تعليقاً