شوارع عمّان وما أدراك ماشوارع عمّان؟؟ لازم ينكتب تحذير على جميع مداخل عمّان ينكتب فيو: شوارع عمّان سبب رئيسي لأمراض العامود الفقري والروماتيزم وأنزلاق الغضاريف وإرتجاج الدماغ.
مع أني مش حابب أقارن بين هون والأمارات لأنه في ناس عم بتحسّسوا من المقارنة, بس حاسس حالي مضطر للشي هاد, يعني فعلاً وضع الشوارع عنّا مزري جداً جداً, فش شارع بمشي فيو إلا بوقع بـ 100 حفرة ومطب وبضل طالع نازل بين رُقع بالشارع وغيرو, بقول يا الله طيب ليش هيك؟ نفسي أمشي بشارع يكون زي العالم والناس بدون ما أقضيها زي اللي بيلعب Play Station عشان يهرب من الحفر.
أمانة عمّان قامت بتزفيت طريق المطار خلال الأسبوع الماضي, خطوة رائعة جداً, لأنه طريق المطار هو الوجه الحضاري للبلد, وهو أول شارع بشوفو أي سائح بفكر يزورنا, طبعاً بالفترة الأخيرة كان وضعوأ مميت جداً, ولكن الحمدلله الوضع صار أحسن حالياً.
وكالعادة, أول ما يخلصوا تزفيت أي شارع, بتزكروا أنه في ماسورة ميّ فاقعة تحت الأرض أو بتزكروا خط كهربا مشرت, بروحوا يحفروا الشارع مرة تانية, وبعدين برّقعوا الحفرة ترّقيع!! وبهيك خلال فترة زغيرة بتلاقي الوضع رجع زي ماكان, يعني محل ما *** شنقوه
نرجع لموضوع المقارنة, من أحد أسباب خراب الزفتة بكتير من شوارع عمّان وبقية المدن هو أنه أمانة عمّان بتوكل عملية تزفيت الشوارع لشركات خاصة عبر عطاءات معينة, بعكس بلدية دبي “ممثلة بهيئة الطرق والمواصلات” اللي بتشرف على عملية التزفيت ونوع الزفتة “الأسفلت” بنفسها وبكوادرها الخاصة, لذلك بتلاقي الشوارع كلها 100% مزبوطة, لأختلاف نوعية الزفتة المستخدمة طبعاً.
بضل بالآخر أحكي أنه ما بدي أحط كل اللوم على أمانة عمّان أو الشركات الخاصة, لأنه معظم الشوارع بتخرب وبصير فيها حفر بعد فصل الشتا من كل سنة, لكن هون بكون دور الأمانة بالصيانة السريعه بعد أنتهاء فصل الشتا, وهاد الشي اللي ما بنشوفوا, لأنه علاج المشاكل بكون بطئ جداً جداً.
on 
on 
8 عدد التعليقات
at 2:37 am - 15th July 2008 Permalink
هههههههههه
انا يا اخي و الله متلك…بس المطبات الاردنية غير شكل…
يمكن اعلى مطبات في العالم..وانا سايق بحس حالي طالع عن هضبة..عنجد بتطلع روحي.
at 7:54 am - 15th July 2008 Permalink
فعلاً كلام منطقي ويصف الواقع دون اي زيادة او نقصان ..
وخصوصاً مشكلة الترقيع حيث نلاحظ وإن لم تتواجد الحفرات نلاحظ اثناء القيادة باختلاف بعض الإرتفاعات في بعض البقع!..
شكرا لك ..
at 1:04 pm - 15th July 2008 Permalink
انا الي علقت قبل فترة انه انت كتير بتقارن دبي ب عمان بس انا هالمرة معك من مبدا انه جبت فكرة انه ليش الامانه ما تصير زي حكومة دبي الها كوادرها الخاصة و هي تشرف ع مشاريع تزفيت الشوارع بنفسها
بعتقد المشكلة انه الكوادر الي عنا و الي بالقطاع العمومي يفتقد للاشراف و الخبرة الي بتاهلم انهم هم الي يشتغلوا بنفسهم تحياتي لك
at 5:30 pm - 15th July 2008 Permalink
سبقتني انا لسا بدي احكي عن الشوراع في الامارات غير
انا مره روحت ع بيتنا حافيه في الامارات و ما اجاني شي؛ تصدق و لا لأ؟؟
الخدمات بره احسن بمليون مره أكيد؛ و المقارنه دايمن مش في صالحنا مع عالاسف
at 12:31 am - 21st July 2008 Permalink
يا رجل الموضوع اللي بتطرحه انت محلول و منتهي …. لانه اصلا الامانه ما بدها تغلب حالها بهيك شي لانه عندها رؤية مستقبلية لحل منطقي و موضوعي لمشكلة الجبال الزفتية اللي طلعت فجأة من الارض > عشان نبري ذمة الجميع < … فــ بيقولولك انهم ما بدهم يزفتوا لانه عن قريب مش رح يظل في داعي للزفتة او لتزفيت زفت الطين اللي اسمه شوارع …لانه عن قريب ان شاء الله رح يخلص المحترم بترول و رح يرحل دون رجعة عن ديار الاسلام و المسلمين … و رح نستعين بوسائل موصلات فعالة جدا مع مشكال الطرق … بالعربي لازم نرجع ع الحمير عشان نبطل نحس بالمطبات …
انا هالحل ولا اروع … ارخص و انظف للبيئة و اخف دم … و بيعمل حركة سياحية ع البلد …
at 10:53 am - 30th July 2008 Permalink
والله صدقت يعني انا اجيت على الامارات من سنة تقريبا والله العظيم ما في حفرة ولا جورة في الامارات طبعا بتمشي بسيارتك ما بتسمعلها صوت
اما في عمان بالنسبة لشوارعنا الي بترفع الراس بتسمع حفلة بالسيارة بسبب الحفر والجور والمطبات الطبيعية والاصطناعية
at 8:10 am - 24th September 2008 Permalink
ربنا يصبركوا لازم تتعودوا لان مافيش حاجة كاملة دي حكمة ربنا
at 2:27 pm - 12th October 2009 Permalink
رجاءا حكينا اكتر من مره لامقارنه بينا وبين اي بلد او الامارات لانه يمكن شوارع الامارات كويسه بالمقابل ماعندهم صرف صحي متلنا اوكي ….. قارن بالمي ميتنا احسن ميتهم مكرره يعني……. عندهم رمل وتغريز سياراتهم متل البلاستك ماعندهم سدود مي شوارعنا احلى شوارع بكفي الطبيعه بكفيك الشجر يعني الشجره اللي احنا مابدنا ياها وبنرميها همه بحطوا تنك مي كامل عليها وجونا حلو والحمد لله عنعمته ومابتمنا من بلدي الاتكون هيك شكرا
أرسل تعليقاً