مش عارف شو سرّ الرقم 100 بالأردن بالفترة الأخيرة, خلال اليومين الماضيات قرأت أكتر من خبر عن صرف مبلغ 100 دينار لموظفي عدة دوائر حكومية وخاصة بالأردن.
القصة بلشت لما جلالة الملك أمر بصرف مبلغ 100 لموّطفي الدولة والمتقاعدين بمناسبة شهر رمضان المبارك, ومن بعديها “إنهالت” الشهامة والنخوة من هون وهناك لمساعدة شعبنا الأردني في شتا المواقع.
كل يوم بقرأ خبر أو أكثر عن صرف 100 دينار لموظفي جامعة أو شركة أو دائرة, البداية كانت بجامعة البلقاء التطبيقية وبعدين بنك الأردن وجريدة العرب اليوم ولحقتهم بالسحبة جامعة البلقاء التطبيقية والقائمة تطول.
يعني شي حلو أنه يحسّوا بمعاناة المواطن بشهر رمضان, وشي حلو كمان فكرة أنهم يصرفوا 100 دينار لألهم, مع أنه عندي إحساس أنه كل “الهيزعة” هاي عشان جلالة الملك صرف 100 دينار لموّطفي الدولة والمتقاعدين, لكن الشي اللي لازم ننتبهلوا أنه السنة مش شهر رمضان بس, أنه بالشهر هاد في 100 دينار زيادة وبقية الأشهر المواطن ياكل ***.
الـ 100 دينار طايرة طايرة مع أول كم من يوم من رمضان, ورمضان بعديها طاير, والمخدّر اللي نعطى للمواطن رح يروح مفعولو قريباً.
بإختصار, اللي بدي أوصلو أنه حل مشكلتنا عمرها ماكانت بـ 100 دينار, العالم ماكلة هوا, يعني لازمنا نفكر كيف نحل مشاكل هالشعب مش كيف نمشي أموروا شهر زمن.
ملاحظة: أكتب إسم 5 دوائر حكومية أو شركات خاصة أمرت بـ صرف 100 دينار لموظفيها, وأربح جرّة غاز
.
عامر الخليلي
7 عدد التعليقات
at 1:25 am - 23rd August 2008 Permalink
يا سيدي … و لا البلاش!
at 2:48 am - 23rd August 2008 Permalink
والله انا برايي 100 دينار بتحل مشكلة ويكثر خير جلالة سيدنا وبتمنى من جلالته انو يامر الشركات الخاصة الي ما اعطت انها تعطي لانو موظفين القطاع الخاص اكبر بكثير من القطاع العام
at 12:34 pm - 23rd August 2008 Permalink
zaman kan lamma el wa7ad bedo ye7ke ino eshe ‘3ale kan y2ool “ya zalameh b 100 laira” !! halla i think they’re not much anymore ! el sha3eb lazem y7awwel la 1000 ,balke el zyadeh el jay bteje alf !
at 1:27 pm - 23rd August 2008 Permalink
كلّه مُخدّر موضعي وترقيع بترقيع, سياسة “لازم يظلّوا شحّادين ويعيشوا ع المكارم”!
at 11:18 pm - 23rd August 2008 Permalink
بحب احكيلك ان ال 100 دينار بالنسبه لموظفين الحكومه صارت مصروفه من قبل ما تيجي…هيك دايما موظفين الحكومه بتطير الفلوس قبل ما توصل لايدهم
الله يعين العالم
at 4:17 am - 24th August 2008 Permalink
الله جاب الله خاد الله عليه العوض
العوض بسلامتك يابا
at 2:36 pm - 7th September 2008 Permalink
وكأنه بس الموظفين اللي اكلين هوا واللي بترتفع عليهم الاسعار بس المواطنين اللي ما بشتغلو بأي دائرة بتجيها الزكيادة هما من كوكب ثاني مبسووووووووووووووووطين على الآخر ليه ما يجي لكل مواطن زيادة كلنا اكمن مليون كيف لو كنا بالصين بتنكسر الحكومة لو وزعت دينار واحد للموظفين هههههههههه
أرسل تعليقاً