رمضان للأسف صاير عند البعض عبارة عن 30 يوم الواحد بكون “ملزم” أنه يكون بني آدم منيح كتير, كل ما بدو يعمل شي مش منيح كان “متعوّد” يعملو قبل رمضان, طوالي بتزكر أنه هو بشهر رمضان وببطل يعمل هالشي.
يعني اللي كان يسكر قبل رمضان ببطل سكّر في رمضان, اللي كان يزني ببطل, اللي كان يسّب ببطل يسّب, واللي كان يسرق بصير شريف مكة في رمضان وقيسوا على هالحكي.
وطبعاً كتييير ناس زي هيك للأسف!!!
وأنا هالعادة هاي بتستفزني جداً بأي شخص بصدر منو هالتصرف, لأنه يا عالم لازم تفهموا أنه الحرام قبل رمضان حرام برمضان وبعدو كمان, ربنا ما حلل السكر والزنا والسرقة والغش والنصب والشتم ..ألخ بـ 11 شهر من السنة وحرّموا برمضان.
رمضان رحمة وغفران صح, ولكن بقية الأشهر وين راحت؟ يعني الواحد فينا بهمّوا يتقرب لربنا برمضان وبقية السنة عينك ما تشوف إلا النور؟؟
انا برأيي الشخصي, الواحد لازم يتوب عن أي غلط بعملو توبة كاملة, يعني 12 شهر بالسنة, أما اللي بدو يتوب برمضان بس وباقي السنة بنسى كل شي, لا منو ولا من التوبة وبالناقص أساساً أنه يحمل الدنيا جميلة أنه صاير بني آدم منيح.
هالموضوع فشّة غلّ من أكثر, وحبيت أكتبو بالعامية لأوصل فكرتي بطريقة ما لهالعالم “الرمضانية”.
ورمضان كريم,
on 
on 
6 عدد التعليقات
at 2:34 am - 2nd September 2008 Permalink
“لا منو ولا من التوبة ” .. لحسن الحظ مش انت اللي بتقرر ان التوبه رح تنقبل او لا .. حتى بالنسبه للي بتوبو فقط في رمضان .. حقيقه هيك ناس بضلهم افضل 100 مره من الناس اللي ما بيعملو اعتبار لرمضان اصلا … بعدين الي بتوبو بس برمضان احنا لازم نشجعهم ونوقف معهم بلكي استمرو بعد رمضان .. الله يهدي الجميع ان شاالله
at 10:24 am - 2nd September 2008 Permalink
انس: لسوء الحظ أنه يساء فهمي دائماً…
التائبين برمضان نوعين, نوع من اللي عندو نيّة التوبة ومع مساعدة الناس الو في أمل كبير مايرجع للخطيئة مرة تانية, والنوع التاني الي هو “التوبة الزائفة” اللي بس بعمل هيك أحترام لشهر رمضان, وحتى إن شجعوه الناس مصيرو يرجع مرة تانية… بتمنى تكون وصلت فكرتي
وأكيد مش انا الي بقرر التوبة, بس هاد رأيي الشخصي بالموضوع
at 11:12 am - 2nd September 2008 Permalink
يعني انه يصيرو يعرفو ربنا برمضان احسن من بلاش انانفسي اشوف هادول الناس الي ما بتعرف ربها بني ادمين بس ليوم مش ل 30 يوم ويا ريت انه يمسكو حالهن برمضان كله قال بكونو عاملين حالهن شيةخ بالنهار وبعد الافطار ببلشو من الزنار ونازل استغفر الله العظيم يعني بنسو حالهن في متل بقول ديل الكلب بضلو اعوج لو حطيته بقالب
at 7:29 pm - 2nd September 2008 Permalink
للاسف هالشي موجود وحقيقه ..وهاد هو ضعف الايمان يا عامر
رمضان اوله رحمه ويتوسطه مغفره واخره عتق من النار لهيك لازم الانسان يكفي حياتو
وهو مرضي ربنا ومش بس برمضان .
at 5:58 am - 6th September 2008 Permalink
هلا رمضان شهر الخير ةالبركات
والمفروض انه الواحد يصوم صح ؟
طب ليه الوضع وكانه انه الواحد بخاف من الناس مو من ربنا
ليه بخالفوا اذا انمسك واحد قاعد بحوش بعيد وعم ياكل او يدخن
لازم يراعوا الاديان والجنسيات الاخرى
او عنده سبب طبي يمنعه من الصيام
وهوي بالشارع عطش او اجا عباله ياكل شي حفيف بما انه مشواره طويل
يعني زي ما الاطفال بالشوارع صايرين بيكلوا وبشربوا لازم يتركوا الناي يلي بتاكل
at 6:04 pm - 9th September 2008 Permalink
اهلا يارمضان . . . كل عام وانتم بخير . . والله يكتب لنا الاجر في رمضان ويغفر لنا
أرسل تعليقاً