مدونة أسكدنيا

بقلم: مياسي *

ليلة البارحة؛ و بعد أن عدت إلى مكان إقامتي في عمّان؛ و قبل أن أبدأ بصلاة المغرب؛ سألتني الفتاة التي تقيم معي في نفس البيت:

-         الدنيا كتير شوب؛ ممكن نطفي الضو و نفتح الستاير؟

-         ما فيش مشكله؛ بس أخلص صلاة بنفتحها

أنهيت الركعات الثلاث؛ و أطفأت الأضواء؛ و فتحت لها الستائر و جلسنا

كانت تتابع برنامجا على الـ إم بي سي الأولى؛ البرنامج و الذي أظن أن الكثيرين يعرفونه: هو “بالصراحة أحلى” مع جويل

جاء التعليق التالي من شريكتي:

-         ولا كأننا عاملين اشي!! فتحنا الستاير عالفاضي!!! الدنيا لسّاها شوب كتير!!!

لا أذكر ماذا كان تعليقي؛ لربما كان ردي بأنها محقّة

قالت:

-إلي صاحبه ( صديقه يعني ) بتابع موقع بريطاني على ما أظن لتوقعات الطقس؛ صاحبتي بتحكي انو درجة الحراره اليوم 43 مع انو التوقعات الرسميه بتحكي انو الحراره 38

-بالله؟؟ ممكن !!!

تتابع: أنا رديت عليها و سألتها عن السبب؛ حكت عشان السياحة ما تتأثر بالبلد؛ ما بدهم الناس تهرب!!

-أنا: ممكن ليش لأ؟

-هي: يعني أنا مش عارفه؛ من شو بدها تخاف الحكومه يعني؟؟ اللي بدو يجي عالأردن بدو يكون حاسب حساب الشوب؛ هاي أولا؛ ثانيا: لما الحرارة تزيد عن معدلاتها و يكون في خطر؛ الحكومة بتنبه الناس عشان يديرو بالهم ع حالهم و ع ولادهم

بدأت تسرد لي أحداث يومها الذي لم يكن من أحسن الأيام لحظها؛ تعطلت السيارة بها و بأختها في منطقة تلاع العلي ؛ و بصعوبة تمكنت من ركنها على جانب الشارع؛ اتصلت بالميكانيكي الذي تتعامل معه دائما؛ و الذي تصادف بأن كان قريبا من المكان؛ السبب كان معروفا لها منذ فترة؛ “طرمبة البنزين خربانه” و منذ ما يقارب الـ 8 أشهر تقريبا؛ ركبت “طرمبه مستخدمه” و لكن يبدو أنها لم تعد صالحة للاستخدام بعد الآن؛ بدأت تسرد لي كم ستكلفها هذه العملية ” 85 دينارا ثمن الطرمبه الجديدة؛ و 25 أجار إيد الميكانيكي – بعد أن وضحت أنه “هيك مراعيها”؛ لأنها تتعامل معه منذ زمن؛ هو لا يتقاضى أقل من 30 و 35 دينارا في العادة؛ و مبلغ آخر لإصلاح مكيف الهواء لتكون المحصلة ما يقارب الـ 150 دينارا”

-وقفت تاكسي و ركبت؛ بعد ما تركت السياره للميكانيكي عشان يدبرها بمعرفته؛ سوّاق التاكسي و من غير مناسبه؛ بلّش يعلق على الميكانيكي “إنو السيّاره ما فيها شي أكيد؛بس الميكانيكي حرامي زي كل ميكانيكية البلد”؛ حتى شوفي هايّو حرّك السياره؛ إطلعت وراي السياره بعدها واقفه؛ حكيت لو لساها واقفه؛ مع هيك هو مصر على فكرة  إنو نصّاب

-         أصلا هو بدو يلطش منك مصاري أكتر؛ سواق التاكسي بيكمل حكي؛ رديت عليه: ما رح يلطش شي؛ أنا عارفه إنو الطرمبه هيك سعرها؛ وعارفه انو الباقي أجرة ايدو يا أخي!!!

-         برضو نصّاب!!

-         رديت عليه؛ صرت أشرحلو كيف البلد بطّل فيها ثقه؛ الكل بدو يكسب من الكل و الكل مش واثق في الكل؛ كل واحد  بيهاجم التاني و بيتهمه انو حرامي و مش عارفه شو؛ إنتا بتحكي انو الميكانيكي نصّاب و أنا كمان ما بوثق في شفير  التاكسي

-         بطلع معكم عيني عالعدّاد؛ و انتو بتضلو تلفو بالواحد في ألف مكان عشان تاخد أجره زياده عالعدّاد ما في ثقه أبدا

بدأت هي بسرد شهادات أخرى في نفس السياق:

-بعرف “موسرجي(سبّاك)؛ مره راح عند ناس عشان يزبط شغله؛ أخدت الشغله معاه ربع ساعه بس؛ و كلفتو مواد تقريبا 50 دينار؛ الجماعه حاسبوه ع 10 دنانير بس بعد شد و جذب لأنها بس اخدت ربع ساعه!!

-بعد سنتين؛ نفس الموسرجي كان إلو شغل مع نفس الناس؛ الشغله كمان بدها ربع ساعه؛ اتعمد انو يماطل و يمد فيها لحد ما اخدت 3 ساعات!!! عشان يطلب 30 دينار بعين قويه؛ والجماعه عطوه!!! (كل هاد طبعا و انا بفكّر كيف الموسرجي بياخد بالساعه!! زي كأنو مستشار مهم كتير في شركه و لاإشي!!)

أدليت بدلوي بدوري؛ حدثتها أنني في إحدى المرات ركبت مع سائق تاكسي؛ و على منحنى خطير صادفنا دورية شرطة؛ الأخ المغامر؛ و دون أي اعتبار للمنحنى و لا للراكب المحظوظ (الذي هو أنا طبعا) قام بحركة بهلوانية لتركيب حزام الأمان؛ بعد أن تجاوزنا الدورية؛ خلع الحزام مباشرة و أخذ في التفاخر بأنه قد نجح في تفادي الدورية و بالتالي توفير الغرامة!!!

لم أعرف بماذا أرد على هكذا “عينّه” بصراحة؛ قلت لنفسي :” فوق الحكومة ما بدها مصلحتك!! لو تموت أحسن يعني!!!”

و هذا جانب آخر من مسلسل عدم الثقة بالحكومة؛ حتى لو كانت القوانين أو التوجيهات في مصلحة المواطن؛ الشعار الدائم: لا تثق بالحكومة أبدا!!!

أناس كثيرون أعرفهم و أسمع بهم؛ لا يتحرجون من “السرقة” من الدولة؛ سواء بسرقة الكهرباء؛ أو عدادات المياه؛ و حتى خطوط الهاتف أحيانا!! لن أتحدث طبعا عن مسلسل سرقة الكوابل النحاسية من محولات شركة الكهرباء و ذلك لبيع النحاس  المصنوعة منه؛ و هذا المسلسل لا يتوقف –وعلى من يريد التأكد من الخبر  أن يتابع الجرائد اليومية.

حين تواجههم بفكرة أن هذا حرام؛ تقع في فتوى جديدة: “السرقة من الحكومة مش حرام!!!”؛ يا سلام!! مين حكى هيك؟؟!!!!!

يعني هذا مبدأ: “اللي بحطو باليمين باخدو بالشمال!!!” ؛أنا شخصيا رأيي في هذا الموضوع أن الذي يسرق من مال الدولة هم كمن يسرق من جيبه الخاص تماما؛ في النهاية الأردن ليس بلدا غنيا لهذه الدرجة؛ و هذا المال ( و المفروض أنه مال عام)؛ هو مالنا بالنهاية؛ فنحن من يدفع الضرائب و يشغّل شركات الماء و الكهرباء و الهاتف أولا و آخرا!!

هذه التدوينة ليست في معرض الدفاع عن الحكومة؛ و لكني تساءلت في داخلي كثيرا عن السبب الذي جعلنا نصل إلى هذه الحالة؛ بمعنى: “هل المواطن هو السبب لأنه لا يثق بالحكومة؟؟” ؛ أم الحكومة هي السبب لأنها “أوصلت المواطن لهذه المواصيل؟؟ بمعنى أنها  دفعته إلى أن لا يثق بها دائما و أبدا؟؟”

و هكذا نعود إلى نفس السؤال الذي بدأنا به:

هل الحكومة “بتضحك علينا” فعلا؟

عنوان مدونة مياسي

http://mayyasi.blogspot.com/