من فترة وانا بستقبل إيميلات “سبام” من موقع عرب نيوز الأردني, وكل مرة بلغي الإيميل وبعمل Report as spam ولكن عبث أنه يبطلوا يبعتولي إيميلات, كل ما أعمل Block لأي إيميل ببعتولي منو برجعوا يبعتولي مرة تانية, لأنهم بضلّوا يبعتوا من إيميلات وهمية على دومينات وهمية كمان.
وطبعاً كل مرّة ببعتولي إيميل بعنوان شكل, وبالغالب بكون العنوان ملفت للنظر عشان يشجّوا الناس تفتح الإيميل, فتحت الإيميل انا لأكبس على إلغاء الإشتراك, بس مافي إلغاء إشتراك ولا شي.
فتت على الموقع لأراسل إدارة التحرير وأحكيلهم “حلّوا عنّي وعن إيميلي” لكن ماردّوا عليّ ولليوم بستقبل سبام منهم.
النكتة بالموضوع, أنه في راس الموقع كاتبين تحذير مفادو “أنه تعلن وكالة أنباء عرب نيوز لقرائها الكرام عن عدم مسؤوليتها عن أي رسالة بريد إلكتروني تصل من الإميل التالي info@3rbnews.net”
“وكالة الأنباء” زيّ ما بسّموا حالهم, بيشكوا من السبام وهم أكبر مروّجين للسبام.. أولاً
تانياً, الغريب بالموضوع أنه أنه دومين الموقع 3rbnews.net اللي بنبعت منو إيميلات بإسم الموقع هو نفس الـ Register لدومين الموقع الرئيسي 3rbnews.com!!
اللي بدي أوصلوا لو حد من إدارة الموقع الموّقر قرأوا الموضوع, أنه حلّوا عنّي وبكفي إيميلات سبام.
on 
16 عدد التعليقات
at 9:48 am - 16th September 2008 Permalink
جززونا يا شيخ , انا بطلت افوت ايميلي الشخصي على اي شي عربي لأنهم راح يقرفوني بسباماتهم…
at 10:17 am - 16th September 2008 Permalink
و الله مش لحالك قرفان منهم !!!!!!!!!
at 12:07 pm - 16th September 2008 Permalink
انا بوصلني منهم بس بوصلني عال junk فبطنشه
انا ما جربت لان الايميل ما بزعجني مدامه بال junk
بس انت بتقدر تراسل الكاتبه هيام عوض على مدونتها هي رئيسه التحرير…لو كبست على كلمه لحظه صدق وبتلاقي ايميلاتها الشخصيه هناك
واحكيلها حلّو عني وبكفي
at 12:35 pm - 16th September 2008 Permalink
ana kman please garaftone
at 3:01 pm - 16th September 2008 Permalink
بالفعل اشي بجنن بعدين المشكلة انهم اكبر مروجين للسبام وانا بطفر منهم بس اشوفهم يلا الله يفك اسرك منهم
^
at 3:19 pm - 16th September 2008 Permalink
بجد هي مشكله والله
انا التانيه في موقع قارف عيشتي S7elaaa@yahoogroups.com
بعمل بلوك عالايميل يلي بيوصلي بس عبث
ازا ما بلكت اكتر من 50 يوزير قولو اكترررررررر
نصيحه اخويه 
بيوصلني بس باسم تاني
والله شي بيطقق
عامر لا تسكتلهن
at 3:20 pm - 16th September 2008 Permalink
طيب شو بيطلع مكتوب بالرسائل
at 4:08 pm - 16th September 2008 Permalink
والله معك حق يا عمر الواحد زهق من هاي الشغلة انا عندي نفس المشكلة ومش عارفة كيف بدي الغي اشتراكي
at 8:31 pm - 16th September 2008 Permalink
الله يجلعه السلام عليكم
at 8:51 pm - 16th September 2008 Permalink
يا فضيحتهم..
بس لقيتهم كاتبين عالرئيسية:
::: تحذيــر هــام :::
تعلن وكالة أنباء عرب نيوز لقرائها الكرام عن عدم مسؤوليتها عن أي رسالة بريد إلكتروني تصل من الإميل التالي info@3rbnews.net
و ذلك بعدما أقدم أحد المارقين على عمل بريد إلكتروني مشابه لبريد وكالة أنباء عرب نيوز الإخبارية مع العلم أن بريد الوكالة هو info@3rbnews.com
at 11:02 pm - 16th September 2008 Permalink
اسامة: التحذير الي مكتوب بموقع عرب نيوز عن موضوع معين عن بلدية اربد, اما الايملات الي عم تنبعت كلها دعاية لمواضيع في موقع عرب نيوز, والايميلات من مواقع وهمية بتبلش ب
adv1
adv2
adv3
ودومينات وهمية كمان, يعني مهما عملت بلوك ع عناوين بضلو يبعتولك…
at 3:23 am - 17th September 2008 Permalink
أنا من رأي نعمل لمة شباب و نروح نكبش الدومين على روسهم !! ولا شو رايكم … بعدين بناخد معنا كم من كلب مشان نخوفهم . في ناس بترتعب من الكلاب , ولا شو رايك عامر
at 3:28 am - 17th September 2008 Permalink
الله يعينك يارب
at 6:11 pm - 19th September 2008 Permalink
ههههههههه
عرب نيوز و زاد
بشوف بركي اليوم او بكرا سحب إيميلك من عندهم
هدول عم بتم إرسالهم عن طريق شركات دعاية و إعلان بالإردن و المواقع ما إلها دخل
يعني بدك تعرف شركة الإعلان يلي عم تبعت و تسحب ايميلك من الداتا بيز
بعدين الدومينات مو وهمية هي محجوزة بس بتم التنافل فيها بشكل عشوائي
at 1:54 pm - 22nd September 2008 Permalink
نحن في شركة الدعاية والاعلان لا نغفل اي طلب للخروج من القائمة الاعلانية
وعلى كل حال على الراغبين بالخروج من القائمة ارسال رسالة فارغة الى
removefromthelist@friendsjo.com
وسيتم حذفه فورا من القائمة
وشكرا
at 7:18 pm - 29th January 2009 Permalink
الله يعينكو
والله هالمشكله بتصير كثير معي بس من موقع ثاني
بيرسل حوالي 80 رسالة في الاسبوع
أرسل تعليقاً