الصورة أعلاة عبارة عن إعلان صادر عن شركة أمنية في الأردن ومفادة زيّ ماهو مبيّن بالصورة أنه أعتباراً من تاريخ 29-10-2008 رح يتم إحتساب “قرش واحد” فقط لا غير على كل تقرير للرسائل القصيرة!
وسبب “لهط” القرش زي ماهوّ مذكور بالإعلان إنه لـ “حرصاً من شبكة أمنية على تحسين خدماتها وتقديم كل ماهو أفضل للجميع”!!
أولاً الإعلان تم نشرة في الصحف الأردنية بنفس الحجم أعلاه ومكان “مدحوش” جوا الجريدة عشان ما حد يقرأة وكل المشتركين ياكلوا “الخازوق” وهم مش حاسّين فيو, وما حد يثور عليهم.
ثانياً, الإعلان فعلاً مخزي جداً, قال سيتم فرض الرسوم لتحسين خدمات الشبكة… ومن إيمتى تحسين خدمات الشبكة لازم يكون على حساب المشتركين من أساسو؟ عرّفوا وين ينشنوا بالزبط, على تقارير الرسائل القصيرة المرسلة, شي مهم جداً والكل تقريباً بيستخدموا ليعرف أذا وصل المسج أو لا..
المكتوب كان مبيّن من عنوانة, شبكة أمنية أشترت الترخيص من الحكومة بـ 13 مليون دينار فقط!! وتم بناء شبكة “نص كم” وبدأ تشغيل الشبكة و”لمّ” مشتركين إعتماداً على مبدأ “حرق السعر”, وبعدين تم بيع الشركة بالكامل لـ بتلكو البحرين بحوالي 493 مليون دينار, صحتين على قلبو لمؤسس أمنية.
أمنية صارت تدوّر على مصادر دخل لتغطي كلفة حرق الأسعار وتصليح وتطوير الشبكة التعيسة جداً من حيث التغطية, ما لاقت إلا تاخد “القرش” من جيوب المشتركين, اللي مع الوقت رح يصيروا يدفعوا على كل زغيرة وكبيرة .
يعني بإختصار زي مبدأ الطيران الإقتصادي Economic airlines أنهم ببيعوا التذاكر بسعر أقل بكتير من شركات الطيران التانية بس بالمقابل لازم تدفع ثمن وجبة الأكل اللي بتتقدملك على متن الطيارة, ويا ويلك لو بدك تغير موعد سفرك, بتدفعلك مبلغ محترم.
نرجع لموضوعنا, بعرف أنه في كتير معلقين رح يحكولي انه لازم نعطي أمنية فرصة لتطور حالها زي ما أنعطى لشركة زين “فاست لينك سابقاً” لحتى طوّرت شبكتها وصارت بالوضع الحالي, ردي الهم أنه إحنا حالياً بنشهد منافسة كبيرة بين شركات الخليوي بالبلد, وكل هالشبكات وراها شركات كبيرة “زين الكويتية, أورنج الفرنسية, إكسبرس من أمريكا, وأخيراً أمنية البحرينية”, يعني بالمشرمحي “عيب هالحكي”.
دبوس: ما بستبعد أنه يصير إتفاق بين جميع الشبكات العاملة عشان يزبطوا الشبكة على حساب المواطن الغلبان.
تحديث:أعلنت شركتي زين وأورنج فرض قرش واحد لتقارير الرسائل إعتباراً من نهاية شهر 10, وبذلك سيكون القرار مطبقاً لجميع الشبكات العاملة بالمملكة!!!
on 
on 
22 عدد التعليقات
at 9:49 am - 29th September 2008 Permalink
أنا كمان استغربت الحركة و اعتبرتها غبية جداً.
بس يعتت أكمن مسج و ما خصم قرش زيادة فوق الــ 3 قروش!
فا … ما فهمت الطبخة!
at 2:04 pm - 29th September 2008 Permalink
لوول
حتى لهون لاحقين الواحد؟ بكفيش شيكتهم اللي بتفصل من نص المكالمه و بتخلي الواحد يحكي مع حاله؟؟
اه يمكن عشان هيك بدهم القرش عشان يبطلو يفصلو!!!
انا خلص بصير اودي مسجات من زين و أحكي من أمنيه لوول
at 2:31 pm - 29th September 2008 Permalink
at 4:52 pm - 29th September 2008 Permalink
الموضوع أغبى من إنو نتناقش فيه!! الكل بدو يسرق مش عارف من وين!! والله جد زمن الوحوش، بس تعديل عامر: الرخصة شروها بـ 13 مليون و الشركة انباعت بـ 493 مليون!!! سبحان الله بس عندي التفسير الشافي بالموضوع! هاد اللي أعطا الرخصة قال للشركة بعطيكوا الرخصصة بسعر “رمزي” بس بتحط بجيبتي 20 مليون برّاني! سكت اللي معو كلهم ب 5! و لهط 15! بعدين قدم استقالته.
at 5:15 pm - 29th September 2008 Permalink
يا حبيبي يا حبيبي على أمنية من أسوء لأسوء والله
من الأول هالشركة وهي مش مصلية عالنبي صراحة
ولحد هسا شبكتها زي الزفت بمرج الحمام وبالبيادر وبالجبيهة يعني متى بدها تتصلح
الله بيعين
at 6:05 pm - 29th September 2008 Permalink
at 6:14 pm - 29th September 2008 Permalink
عمر: شكراً للملاحظة,, تم التعديل
at 9:11 pm - 29th September 2008 Permalink
والله صحتين والف هنا ….
واللهم شماته كمان !!
at 11:09 pm - 29th September 2008 Permalink
حرام عليكم يا ناس…
اعتبروها عيديه !!!
at 2:11 am - 30th September 2008 Permalink
زين سوت نفس الاشي بجريدة الراي اليوم اعلان غير واضح و بنفس الطريقة
at 10:04 am - 30th September 2008 Permalink
la2 8aweyaa 2l 7arake
at 12:31 pm - 1st October 2008 Permalink
امنية بيطلعلها
بيكفي انو دقيقتها بقرش
يا عمي بتشجع المواطن يحكي وما في داعي يبعت رسائل
بدل ما تبعت رسالة احكي اربع دقايق
at 12:39 pm - 2nd October 2008 Permalink
ول ول ول … ياه على البياخه… شركه طفرانه ….
همه مش مستحين على حالهم ……….يا باطل
at 4:17 pm - 2nd October 2008 Permalink
موضوع فيو تخبيص لأنو القرش مش أمنية بس اللي رح تاخذو، كل الشبكات في الأردن زين وموبايلكم رح تاخذ القرش
ولا هة كب بلا وبس
at 2:21 pm - 3rd October 2008 Permalink
ya umniah mo lazem bl awal t7asne alersal o ba3dean btsear tsh7ade ya3ne bkol 3ean 2awyh bdak floos mn alnas ok bn3teke ya sha7ada bas 7asne al2ersal ya mama walah
3omre ma thaneat fe mkalma wa7da bas a7ke ma3 7ada befkrone msafra
o lazem atla3 3ala ras jabal shan y2wa ale2rsaaaaaaaal
o lessa bdak tsh7ade ya umniah?????????????????/
at 4:53 am - 12th October 2008 Permalink
الموضوع انو الشركات كلها ضومت مع بعضها عالكستمر المسكين .. هية من ناحية تقنية المسجات خدمة عالأغلب غير مجدية للشركات لأنها مكلفة و لانها بتقلل من قدرة استيعاب مكالمات اكتر..يعني هية مش مجدية لانو ممكن تقلل الربح الهائل مش انهم خسرانين من وراها
.بس اول عن اخر هاي خدمة و مدفوعة فالموضوع غريب و كأنا بنرجع لورة فا انا بستنى 28 عشان اشيل الربورت يعني حرام انا خط طلاب بدفع اشتراك عشان ابعت المسج ب قرش اروح ادفع كمان قرش للريبورت خلص عالنية الواحد يصفي نيته و يبعت بضمير و انشاللله بوصل
at 1:05 am - 13th October 2008 Permalink
والله عرفوا يلعبوها …
والله ما حدا رح يدعوس ويروح بين الرجلين الا الطفران والشباب
اللي بتقعد ساعة لتكتب مسج وساعة لتمحي وفي النهاية بتوصل
للشب وهي لحيتي اذا فهم منها اشي لأنو الحروف كلها مشبكة ببعض
للمعلومية : العرض هاد على كل اشبكات مش على امنية بس
at 11:27 pm - 25th October 2008 Permalink
أمنية شبكة عاملينها للسلبطة يعني أضعف من هيك شبكة الله ما خلق
at 12:40 am - 26th October 2008 Permalink
يا شباب اللي مو عاجبته شبكة امنية في غيرها وبعدين شركة امنية هي الوحيدة اللي بتحاسب بالثانية وهي شبكة الطفرانين والمساكين وارخص تعرفه- والقرش اللي بدهم يوخدوه مو عشان تحسين الشبكة لانه كل الشركات رح توخد قرش عالتقرير
عفكره انا معي خط اورانج
at 12:46 am - 11th December 2008 Permalink
انا شخصياً جلطتني شبكة أمنية.. ما بتحكي المكالمة غلا الخط مفصول.. وشبكة تعبانه من الأخر.. وصار لي اكثر من 18 شهر وانا بحكي معهم على شان البث.. وبلا فائدة.. وآخر شي فصلت الخط وريحت راسي.. وشو يعني لو كانت الدقيقة من اول ثانية ما الخط بيفصل من ثاني ثانية..
انا اكثر من مرة اقترح عليهم يغيروا شعارهم
أمنية.. يرجى الاتصال فيما بعد
أو
أمنية.. الله لا يُردّك. .
أو
أمنية.. يا رخيص
at 1:36 pm - 16th December 2008 Permalink
للعلم إنو شبكة أمنية تم توسعة تغطيتها وهي الأن شبكة ممتازة جدا وخصوصا إنها الشبكة الأقل تعرفة في الأردن بالثانية من أول ثانية وشبكة أمنية هي إلي عملت الأردن أكثر دولة تستورد الهواتف النقالة في الشرق الأوسط لأنه بصير عمر الواحد أو الوحدة 10 سنين بدو تلفون وطبعا خط امنية وشكرا
at 6:50 pm - 26th July 2009 Permalink
والله اشي بقهر الواحد بكيف انو الدقيقة رخيصة وبلهطوا المصاري باشي تاني امنية شبكة فاشلة فانا مثلا معي خط انا شباب الجديد اللي دقيقته قرش وبدي اغيير تعرفته لخط 3*3 لانو بدون اشتراك شهري واولاد الحرام بدهم 2 دينار مع انو لازم يكون ببلاش لاول مرة وانا مش زابط معي شو اعمل ؟
وبعدين ليش الاشتراك الشهري
والله لو عندي شركة بنزل اعلانات تكسسر الدنيا
وبكون سعر الخط دينار والدقيقة قرش والمسج قرش وخط سوبر ببلاش تحكي معوا زي ما بدك
وهيك بكون الكل مبسوط
أرسل تعليقاً