تم نشر هذا الكاريكاتير في جريدة الغد الأردنية الإثنين الموافق6 /10 /2008, وكاد أن يمرّ مرور الكرام لولا محاولة بعض الفئات إثارة البلبلة لتحقيق أهداف شخصية.
بدأت القصة بنشر موقع رمّ الأردني ما أسماه برسالة من مواطن حوّل الكاريكاتير, وفيما يلي نص الرسالة كما نُشرت بالموقع:
الأخوة في موقع « رم » الكرام …. أدعوكم و أدعو متصفحي موقعكم الكرام لمقاطعة صحيفة الغد و المطالبة بسحب عددها ليوم الإثنين الموافق6 /10 /2008 و ذلك بسبب الرسم الإلكتروني المسيء للإسلام و المسلمين الذي خط بيد السيد حجاج ( هداه الله ) …
إن الرسم الذي يحوي في طياته الكثير من المعاني التي يحاول الغرب إلصاقها بالمسلمين ، فكيف تكون قباب مساجدنا كالقنابل و ديننا يدعو للتسامح ؟ بأي عين رأى الحجاج مساجدنا ؟ أبعين أمريكيــــة حاقدة مأجورة ؟ ……
أدعوا أن تضاف صحيفة الغد إلى قائمة المقاطعـــة الدنماركية لحين سحب الرسم من الموقع الإلكتروني و تقديم إعتــــذار في الصفحة الأولـــى المطبوعــــة ليس للأردنيين فحسب ، و إنما لجميع المسلمين في أرجــــاء المعمورة .
و الله من وراء القصـــد .
بالإضافة لكثير من التعليقات الغريبة جداً من بعض المعلقين, سواء في موقع رم الإلكتروني أو جريدة الغد, حيث ذهب بعضهم الى “تكفير” عماد حجاج, وإعتباره منحازاً “للصيهونية الأميركية” والمطالبة بمقاطعة رسوماته ومعاملتها كالرسوم المسيئة للرسول (صلى الله عليه وسلم), ومن الممكن إهدار دمه أيضاً.
هذه دعوة للجهات “التكفيرية” التي تعمل “بكبسة زر” لتقرير من الكافر ومن يستحق أن يهدر دمه الى تشغيل الجزء المعطّل من المخ والتفكير جيداً قبل إصدار التُهم والحكم السطحي على ما يشاهدونه من حولهم.
أرشيف عماد حجاج يشهد على مواقفه الوطنية في مختلف القضايا, فهو يرسم واقع المواطن الأردني بكل تجرد وواقعية, بالإضافة لتطرقة لمواضيع مختلفة على الساحة الإقليمية خصوصاً القضية الفلسطينية.
الكاريكاتير -برأيي الشخصي- فيه إشارة الى الوضع الراهن في العراق, فهناك تفجيرات في كل مكان وزاوية في مختلف المدن العراقية, فحتى المساجد (وهنا موضع الإختلاف) لم تخلو من التفجيرات, سواء لدى الشيعة أو السنة على حد سواء.
رأيكم؟
on 
on 
32 عدد التعليقات
at 3:22 am - 9th October 2008 Permalink
تـ ـخـ ـلّـ ـف
at 3:32 am - 9th October 2008 Permalink
طيب يا سيدي اليس عماد حجاج هو اول من طبل وزمر لفتوى قتل ميكي ماوس .. وطبعا الكاركتور انتشر بعنف .. وعندما ثبت بالوجه القاطع عدم صحة هذه الفتوى وتبين للناس المصر الاساسي لظهورها لم يملك حجاج الشجاعه الادبيه للاعتذار .. انا مش مع تكفير او لاسمح الله الاعتداء على شخص لاي سبب كان .. ولكن عماد حجاج في الفتره الاخيره اصبح مصدر افساد اكثر منه اصلاح .. وصار متله متل غيره
at 10:44 am - 9th October 2008 Permalink
لقد جددت إشتراكي في الغد قبل أسبوع. رسوم الكاريكاتير للحجاج أحد أسباب إشتراكي. لا أرى أي خطأ معبر في هذا الكاريكاتير أبداً.
أخ عماد عليك بهاؤلاء الذين لا يعرفون الفرق بين السخرية و الاهانة.
at 11:15 am - 9th October 2008 Permalink
هو بصراحة ما كان في داعي ل هيك كاركاتير لانه واقع العراق ل حاله مفهوم ما بمر يوم الا و بصير فيه تفجيرات….بخصوص كاركاتير ميكي ماوس السيد احمد معه حق لازم قدم اعتذار لانه مبينة الفتوى كاينه فيها غلط و الموضوع تاخر ل حتى ما تفسر او توضح
at 11:15 am - 9th October 2008 Permalink
سلام واللة شايف عماد حجاج كثير صاير يميني يعني تعليقاتو كثير علا حماس وحزب اللة بوجهة نظر عربية رسمية مفهوم شو يعني يعني الرجل علماني كثير ومتحامل علا الأسلامين وهاي ملاحظة علية في الفترة الأخيرة وخصوصا في ازمة لبنان الي راحت تهجم كثير علا حزب اللة (هيفاء وهبي والمقومة) يعني بصراحة شئ معيب منو يعلق علا حزب اللة بهاد الشكل
at 12:06 pm - 9th October 2008 Permalink
فعلا ً … مش عارفة شو أحكي ,,,
بيتركوا كل المواضيع الموجودة و المشاكل إلي عن جد بتستحق إنه يلقوا الضوء عليها و بصيروا يفتشوا عن كاريكاتير و على هدر دم …!!!! و بيحكموا على واحد كافر و لا مش كافر …
أستغفر الله …
at 12:06 pm - 9th October 2008 Permalink
عماد حجاج رسام يرسم رأيه بكل تجرد
وان كان رأيه لا يناسب رأيك فهذا ليس معناه أن نكفره او ان نتهمه بانه يميني او يساري كما علق احد الاخوة المعلقين
عماد رسم عن خلافات “الأولاد الأشقاء” بين فتح وحماس, ورسم عن حزب االله ابان المشاكل الداخلية التي سببتها مشكلة المطار قبل شهرين تقريبا في بيروت
يجب ان نفكر بالموضوع بعمق كبير
وانه ليس محرما ان يرسم حسن نصر الله او ان يرسم مشاكل فتح وحماس.. فاذا كنت تراها صحيحة فأنا وكثير غيري لا نرااها كذلك
شكرا لك اخي
at 12:45 pm - 9th October 2008 Permalink
اخ هشام شكرا علا تعليقك بس للمعلومة انا فتحاوي اصلا لكن بعتز بكل الفصائل المقامة في كل العالم من امريكا اللآتينية حتا وطنا العربي الكبير بس في مراعاة للمشاعر العامة يعني ما في ارسم عن الرسول واحكي هاي حرية رأي بدك ترسم وتعبر عبر عن رأيك مش عن رأي حكومة وهاد الي صاير مع عماد حجاج عماد ابن مخيم الوحدات يعني مفهوم شوي توجهو بس انتقل 180 درجة من مقاومة وسلاح الي مهادنة احسن شي يروح علا موقع العربية دوت نيت ويحارب (التكفيريين والوهابييين ) علا رأي العراقيين والي بطبلو لأحتلال
at 3:57 pm - 9th October 2008 Permalink
والله يا أسكدنيا احنا بنحزن علينا ..
عنجد لا خالصين من هيك ولا خالصين هيك ..
وشايفلك اياه صايرة موديل : الي ما بفهمه بكفروا وهيك ..
at 4:23 pm - 9th October 2008 Permalink
لا حول ولا قوة الا بالله
الي بحكي الحق صار كافر ويهدر دمه
طيب خلينا نفكر فيها … ما صار تفجيرات بالمساجد
الزلمة ما جاب اشي من دار اهله
يمكن الي حكا هالكلام مش فاهم الكاركتير
او بيكره عماد
الله يهدينا ويهديهم
at 4:46 pm - 9th October 2008 Permalink
ول … عماد حجاج … فنان محترم وصاحب رساله …
at 5:40 pm - 9th October 2008 Permalink
يا زلمة قمة الغباء و العقد النفسية .
at 6:15 pm - 9th October 2008 Permalink
ما تستغرب يا أخ عامر.. يعني أنا شخصياً مو مستغرب لإنهم كفروه وحكوا عنو كافر.
هذه المهنة أو الأسلوب الوحيد الذي تتبعه جهات تدعي أنها حريصة على الإسلام والمسلمين.. إنسان كان معارض بموضوع معين ينعتونه “بالكافر”.. هاد الشي موجود عنا بخانيونس وبكل قطاع غزة ، ومن دون ذكر هذه الجهات فهي معروفة للجميع.. شغلتها وعملتها التكفير.
يعني أنا انحكى عني كافر لمجرد أني أنتمي لحركة فتح ، واتهمت بأني عميل وبأني سأبيع فلسطين وهذا كله بسبب انتمائي لفتح.. فكيف بعماد حجاج ، الجهات التي “تدعي” حرصها على الإسلام فلتصلح “العوج” في هذا الحرص.. وكل انسان له حرية التعبير والرأي ، وليس عند أحد أي حق بالتعرض لهذه الحرية بأي حجة من الحجج.. قال هدر دم عماد حجاج قال
.
at 6:24 pm - 9th October 2008 Permalink
أنا لا أستغرب من هذه الأعمال التكفيرية لتي تقوم بها جهات “تدعي” حرصها على الإسلام والمسلمين.
الجهات هاي شغلتها وعملتها تكفر الناس على الفاضي والمليان.. إسألوني أنا.. أصله أنا تعرضت للتكفير أكثر من مرة ومن جهات تدعي حرصها على الإسلام واتهمت بالعمالة.. عادي ما تستغربه تكفير على الفاضي والمليان.
يعني هون عنا بخانيونس التكفير شغّال ليل نهار من قبل حماس.. وعلى الجهات التي تدعي حرصها على الإسلام أن تصلح “العوج” الموجود في حرصها.
at 8:03 pm - 9th October 2008 Permalink
أخي الكريم :
أنا رأيي من رأيك ، وبصراحة كان هذا تصوري لهذا الكاريكتير من النظرة الأولى له ، بأن العراق لم يبقى فيه حُجر إلا وطالته يد المفجرين والمخربين ، وليس كما قال الأخ برسالته لموقع رم …
كلنا واثقون وكل الثقة بنية الأخ عماد ونظرته ، ونحن نتابعه أول بأول وبشكل يومي ولم نشهد له يوم بدا به مسيء او ينوي الاسائة لأي دين من الأديان …
وأنت أخي عندما تنظر لهذا الرسم فكر به هل سلم المسجد من التفجير ؟ السيارات هل سلمت ؟ الدبابات ؟ الخ …
كل العراق بات معرضا لعمليات التفجير ولم ولن يسلم به مكان ، بنظري هذه كانت نية أخونا ورسامنا القدير عماد حجاج …
at 9:26 pm - 9th October 2008 Permalink
ول ول ول هدر دم وتكفير مره وحده
طيب هدول المفتين ما بعرفو انه ما بصير نكفر اي شخص كان
“ادعوا أن تضاف صحيفة الغد إلى قائمة المقاطعـــة الدنماركية ”
وانا معك عامر الموضوع كله عن العراق…وانا قرأت في احد التعليقات بجريده الغد ان الكاريكاتير قديم برجع لل 2006 وكان واضح وقتها انه عن العراق…مع اني بصراحه مش متزكره انه مر علي
at 12:58 am - 10th October 2008 Permalink
عشان هيك طول عمرنا رح نضل متخلفين…
إذا أراد الفرد أن يرى شيئا كما يريد فسيراه كما يريد، الكاريكاتير ككل إنتاجات عماد المبدعة تتطلب فهم المعنى المبطن، وأنا بصراحة لأول وهلة رأيته ضحكت لسبب واحد، ويمكن فهمي له كان مختلفا: فقد رأيت سخرية حجاج من الواقع الحالي والخوف المستمر للناس من التفجيرات لدرجة أن الشمس قنبلة، بمعنى اخر الواحد صار يخاف من خياله!
وقد يقصد أيضا حال العراق بالتفجيرات المستمرة عن جنب وطرف..على كل حال بيكفي هدر دم كل واحد بدو يفش خلقه..الواحد مش ناقصه قمع أزود من اللي هو فيه!!!
at 7:53 pm - 10th October 2008 Permalink
والله الشيوخ حاطيين حالهم زي خوري في كنيسه يعطو صكوك غفران لمن شائو ويقتلو من شائو
المصيبه انو اغلب الشيوخ لحيه وتوب قصير بس من دون علم او معرفه
at 1:43 am - 11th October 2008 Permalink
لا يا أخ عامر حرام هدول يطلق عليهم شيوخ لأنه بنقلل قيمة الشيوخ الحقيقين
هدول بينحاكلهم اجا يتفنن خزا حاله
at 4:41 am - 12th October 2008 Permalink
والله انا بشوف انو اكتر المشاكل و البلبلة أولا بتصدر من ناس غير مؤهلين لاصدار احكام بحق غيرهم ثانيا بتكون بعيدة كل البعد عن المسائل و القضايا الجوهرية…يعني انتقادات من هالنوع الغير منطقية رح تخلي الناس ينفرو من الفكرة بحد ذاتها يعني بكرة بسير كل واحد بشوف اي انتقادات عن شخص اساء للاسلام اشي عادي مع انو يمكن يكون جد خطير و يستاهل
at 9:18 am - 12th October 2008 Permalink
عماد فنان ذو رسالة
ونحن هنا نحب رسوماته جدا
قد يخطا احيانا
ولكن تبقى اعماله الوطنية في الريادة دائما
at 6:17 pm - 12th October 2008 Permalink
السلام عليكم
أولا شباب بدون الضجة والكلام
الرسم حرام إذا كان فيه ذوات الأرواح
وقوله صلى الله عليه وسلم: أشد الناس عذابا يوم القيامة المصورون الذين يضاهئون بخلق الله
ولقوله صلى الله عليه وسلم : ” إن أصحاب هذه الصور يعذبون يوم القيامة ويقال لهم : أحيوا ما خلقتم ”
الله يهديكم
at 5:29 pm - 14th October 2008 Permalink
السيد عماد حجاج فنان موهوب ورسوماته ناجحه وبتجذب الناس لمشاهدتها وحتى انه في قسم كبير من الناس بيتابعو الكاريكتور الي بيرسمه بشكل دائم
لكن اسمحولي اني اعلق ع هالرسمه الي قدامي .. أولاً كل شي مرسوم فيها محطوطله قنبله
( الناس , الغيمه , السياره , الدبابه , الكهرباء …………….كل شي لحد ما نوصل ((للمسجد))
برأي انه هو حر واله الحق يعبر عن نفسه لكن لحد المساجد والدين الرجاء انه في أمور مالازم انه تكون عرضه للأستهزاء ولا اصلاً تنحط بكاريكتور
يعني بصراحه مع كل الحريه الموجوده في الغرب أتحدى الجميع انهم يلاقو رسام كاريكتور غربي متلا عمل رسم لكنيسه او لصليب او لأي رمز من الرموز المسيحيه وحط عليه قنبله ولا حتى فتاشه.. يعني اتوقع انه مع كل الحريات عنا الا انه الحريه في الغرب اكبر ومع هيك مامكن تلاقي رسمه متل هالرسمه
ولو اطلعنا من جانب اخر .. وحدا من هالمرتزقه او الاجانب الحاقدين شاف هيك رسمه بتوقع انه رأيه رح يكون انه” اذا هم برسمو هيك ……….احنا شو علينا !!!!!!!!!
وكلمه كمان لكل المساندين من الصحافه او غيرها يعني مش بالضروره انه تنصر اخاك ظالماً او مظلوماً وياريت تحكموا بمصداقيه
at 1:58 am - 15th October 2008 Permalink
أسماء
غلطانه مليان في الغرب إستهزاء بالدين.
مش معنى هذا إنه صح.
لكن الفرق إنو لما حد يسخر بالدين ما حدا بجي بقول خلينا نقتلو.
على الأقل من العصور الوسطى بطلت هذه العادة.
إذا مش عاجبك فنو اكرهي إنتقدي ايش ما كان لكن مش لكن مش قتل و سجن.
هذا تطبيق الحريه.
at 2:32 am - 16th October 2008 Permalink
انا يا أخي ما بطالب انه ينقتل ولا ينذبح ولا كل هالكلام هاد بس الي راسمه اكيد مش مزبوط واتوقع انه هاد كمان رأي حضرتك
بس في الاسلام في اشي اسمه عقوبه تعزيريه اذا بتعرف.. يعني العقوبه والقصاص مش بس ذبح وسلخ كمان بدي اروح ابعد من هيك …بلاش عقوبات من الشريعه الاسلاميه يعني انت كقارىء وين احترام الرسام لمعتقداتك الدينيه اتوقع انه على الاقل لازم يعتذر عن هالرسمه لأنها غلط
اما بالنسبه للغرب مهما كانت تطاولاتهم مابتصل للمجاهره برسم مثلا يسيء للصليب او المسيح يعني مثلا صوره للعذراء مثلا ماسكه قنبله ومتفجرات فاسمحلي اني اطالب الاستاذ عماد حجاج بأعتذار عن هالرسمه
at 12:27 pm - 28th October 2008 Permalink
ليش دايما بنحكم على الأمور بطريقة سطحية و ما لازم نتسرع طيب يمكن قصده التعبير عن المجرمين الي بياخدو م الدين غطاء لتشويش افكار المسلمين وتوجيههم نحو الأرهاب بمفهومه الصح مو الموجة من قتل الأبرياء وممكن يكون قصده انه حتى المساجد ما سلمت من الأذى…لازم نكون أوعلى من هيك
ومش بسهوله نهدر دم إنسان ما علمنا رسولنا هيك
at 12:44 pm - 28th October 2008 Permalink
سيد عماد ياريت كل واحد حاول يهاجمك شيلو من هالدنيا لانو لساتنا متخلفين نفهم كل اشي على كيفنا وانتا شرحت واقع موجود في مجتمعنا العربي المراه الجاي اعمل كاركاتير عن طريقة تفكير العرب في صياغة المواضيع والتاليف العربي الشهير الله بعين هادا الي اجاك من بشر ما عندهم اي تفكير واحنا جنبك دايما ارسم الي بملي عليه قلبك من دون تفكير
at 6:01 pm - 28th October 2008 Permalink
المشكلة يا اخوان , ان العرب ما بفهموا بالحياه , بعدنا عايشين مثل ما جدودنا عاشوا بس زياده سيارات وطيارات , العالم وصل للقمر واحنا بعدنا بنفكر انه هذا حرام ولا لا .
يا عرب فكروا واكبروا بكفي تخلف
at 7:30 pm - 28th October 2008 Permalink
عنجد الكركتير بعطي صورة غلط عن المسلمين لانو باكد انو التفجيرات و القنابل سببها المساجد و المسلمين اللي بصلو بالمساجد هيك بتسبت علينا التهمة كمسلمين انو احنا ارهابيين
بنصحو لعماد انو يعتذر عن الكركتير بطريقته
at 2:32 pm - 29th October 2008 Permalink
لكل شخص حرية التعبير عن الرأي اللذي يتبناه………..,ولكن بعيدا عن هذا الموضوع,أود أن أنبه الأخ
Hani obaid الى ما قد كتبه,ليس هناك فرق بين الأهانه و السخريه,أن تسخر من الشخص هو نفسه كأن تستهزه به,ربما خانك التعبير.
at 2:36 pm - 31st October 2008 Permalink
كل الاعتراض عبارة عن سخافة ..
انت لمّا تعرف تفسر الكاريكاتير وتحلل شوي بس وتشغل عقلك بعدين ابتعمل بلبلة وقصة ومن الحبة كبة
حجاج عمرو ما أساء للإسلام ولا حتا من غير قصد ..
الرجال بيحكي بأسلوب ساخر عن نظرتنا للجهاد ومفهوم انزرع بروسنا عنّه هذا من جهة ..
ومن الجهة الثانية ياعمري .. هو بيتكلم عن الأوضاع اللي تواجهنا ..
الكاريكاتير إلو أكثر من عمنى وبعبر عن حالة ” الانفجار العصبي والنفسي ” اللي بعيشها المواطن العربي المسلم … طبعا لأكثر من سبب..
والسلام
at 8:47 am - 1st November 2008 Permalink
الكاسة اللي نص مليانه هي نفسها اللي نص فاضيه ,ألك الخيار تشربها أو تفكر فيها ليش فاضيه,و الرجل تاريخه بشفعله.
أرسل تعليقاً