بالمناسبة, العنوان مقتبس من مقال نشر في منتديات أبو محجوب من سنتين, ولكن للأسف لم أجده بسبب ألغاء عدد كبير من المواضيع من المنتديات.
احنا شعب طول عمرنا بنحسب حساب لكل شي, بنفكر كل شي مدبر, بنآمن بنظرية المؤامرة بكل مصيبة بتصير بحياتنا سواء النا أو لغيرنا, طبعاً الفيديو الي شغال فوق قديم جداً, واحد فايق ورايق فش وراه شي ألف قصة من ورا ورقة الـ 20 دولار, بأنه كل شي صار بأحداث 11 أيلول بالورقة هاي, كأنو أمريكا خبت كل سر أحداث أيلول جوات ورقة الـ 20 دولار.
لسه هاي بسيطة جداً, أكيد معظموا بعرف قصة 11 أيلول الى طلعوها من القرآن الكريم, مش حابب أعيد نشر القصة كلها لأنه بحسها “ضرب” من ضروب الغباء الشديد جداً الي بمتاز فيو البعض, لكن للي ما حصلو الشرف وقرأ الحكي الي مآلف من القرآن الكريم وربطو بالأحداث يكبس هون ويقرا.
الأشاعه بتنتشر بالأنترنت بسرعة الضوء, ويا سلام لو كان الي مألف الأشاعه مفبركها بطريقة بتخلي معظم الناس تصدق الى بتشوفو, وطبعاً كتير منا ما بغلب حالو أنه يفكر شوي بالحكي الي بقرأو, بتلاقيه قرأ الحكي المكتوب وبعدين حكى سبحان الله وبعدين عمللها Forward للناس الي بعرفهم, وخلال فترة قصيرة بتلاقي الكذبة صارت “مسّلمة” والكل مصدقها ويا ويلو الي بحكي لا هاي أشاعه, طوالي تهمة التكفير بتكون جاهزة .
الصورة بالأسفل وحدة من أساليب الكذب على العالم والأستخفاف بعقولهم, كمان واحد فاضي أشغال عامل صورة Animation بدّعي فيها أنه الشمس تشرق من مغربها في المريخ كاتبة أسم الجلالة في الكوّن.. !!
أما المصيبة الكبرى فهي صورة الهيكل العظمي بالأسفل, لاقيتها على منتديات كتيرة بالأنترنت, صورة مفبركة لهيكل عظمي لأنسان يقال أنه من عصر سيدنا آدم عليه السلام, مع أنه سمعنا كتير أنه الأنسان في هديك الفترة كان عملاق جداً, بس ما وصلتنا صوّر ولا لاقوا هياكل عظمية ضخمة…
بالنهاية, دعوة للتفكير قليلاً, هل وصل الأستخفاف بعقولنا لهذه الدرجة؟؟ فكر قليلاً!
on 
9 عدد التعليقات
at 2:55 am - 5th March 2008 Permalink
صورة الهيكل العظمي هي صورة مشاركة في احسن صور مفبركة.. و مجموعة صور اخرى مثل قدم البيبي الظاهرة على بطن الأم
بالفعل.. كلامك .. ياما حكيته… شو بنحب نصدق اي شي
at 12:54 pm - 5th March 2008 Permalink
أخي الكريم أنا زميلك خليل من موقع دي ون جي وعنوان مدونتي أعلاه أتمنى في الايام المقبلة بأن يحصل تعاون وتبادل فيما بيننا بالمواضيع والأفكار …. وعلى فكره أنا لا أزال طالب سنة رابعة في الزيتونة .. وعلى هيك احنا زملاء … تحياتي الك وعلى مدونة الملفتة للانتباه بصراحة
at 1:03 pm - 5th March 2008 Permalink
لو ناديت لاسمعت حياً … ولكن لا حياة لمن تنادي.
at 2:34 pm - 5th March 2008 Permalink
قويدر: المشكلة أنه بنصدق أي شي بدون دليل وكمان بنربطو بالدين والأسلام وبتلاقي العالم بتصير تحكي سبحان الله ومش عارف شو , وفي كمان موضوع مرة انت نزلتو بمدونتك عن أنه الكعبة بنص العالم, هيّ كمان كذبة الكل صدقها ..
خليل: أهلا فيك بالموقع, سعيد بتواصلي معك, ومستعد للتعاون بأي مجال معك, وازا بدك بنتواصل بالايميل وبنحكي بالتفاصيل.. وهلا بكل شباب الزيتونه
على راسي 
جاسم: لا حياة لمن تنادي بالمرة طول ما أحنا هيك
at 10:14 pm - 5th March 2008 Permalink
لا حول ولا قوة الابالله شوا بتقول اخي عامر انها مفبركه لا يسدي مش مفبركه هي صورة جد جدي الله يرحمه ^ y
عشان هيك لا تستعجل وترمي احكم علي الصور مره تانيه ههههه 
at 10:48 pm - 7th March 2008 Permalink
بدون تعليق…
الله أعلم
at 1:35 pm - 29th October 2008 Permalink
مش اشي غريب علينا بكفي انا احنا خبطما على وجه الاجانب بشطارتنا !! 50 قناة اغاني في قمر واحد يكفينا فخرا
at 11:36 pm - 16th November 2008 Permalink
اللي بصدق هيك تفاهات مع احترامي انسان سفيه
هو في مؤامره فعلا بس كانت من داخل امريكا من داخل اجهزتها الامنيه لتسهيل تحقيق اهداف المحافظين الجدد
صورة الهيكل العظمي عادي جيب اي هيكل عظمي من اي قبر منبوش وانشره وقول اللي بدك اياه
فالانترنت قريه عالميه زغيره وممكن يتصدق فيها الصحيح والغير صحيح
at 11:38 pm - 16th November 2008 Permalink
وبالمناسبه اللي قال انه احداث سبتمبر مذكوره في القرآن هو عمرو خالدذ
أرسل تعليقاً