يعني انا وصلت لدرجة القرف من وضع السيارات في دبي, الي معوش سيارة مش مرتاح والي معاه سيارة كمان مش مرتاح, الي معوش سيارة متبهدل بالشوب وقلة التكاسي, والي زي حالتي معاه سيارة لازم يتبهدل بصف السيارة كل يوم, يعني الباركن زي ما بحكوها هون.
بدت مشكلتي لما اشتريت سيارة من سنة, كل يوم لازم اقضي نص ساعه او ساعه الف ادوّر على مكان لاصّف فيو سيارتي, وبالاخر انا وحظي, لاقيت مكان عند البيت بصلي الف ركعة شكر لله انه لاقيت, واذا ما لاقيت مكان قريب من بيتي لازم أصف بآخر الدنيا وآجي مشي, يعني بحدود كيلو أو كيلو ونص مشي, وبكرة لما يجي الصيف الله بستر.
صرلي فترة بصف السيارة بعيد عن البيت زي ما حكيت قبل شوي, وراضي باللي الله كتبلي اياه, اليوم لما طلعت ع الشغل, مشيت مسافة لوصلت للسيارة, ركبت فيها لأحميها, فجأة اجالي واحد هندي بحكيلي: هاد ارباب مال انا خبر ممنوع ساوي باركن هون, أنا حكتلو انت شو دخلك؟ حكالي انا ناطور مال هاد بيت, وارباب خبر كل الناس الي ساوي باركن هنا أنه في خبر بوليس يجي ساوي مخالفة بعدين شيل سيارة من هني.. حكتلو هاي ارض مال Goverment والي بطلع بأيدك ********* الي آخر الحديث, وحطيت D ومشيت.
ما بطلع بأيدو يعمل شي لأنه مافي اشارات ممنوع الوقوف.. طيب لو ركبوا؟؟ شو أعمل؟
ع فكرة, هاد هو المكان الوحيد الي بلاقي فيو مكان بالليل لما ارجع من شغلي أو أكون سهران بره,لو منعوا الصف هون وين بدي أصف المحروسة سيارتي؟ مافي ولا مكان بالمرة, ولو صفيتها أي مكان رح يكون مصيري مخالفة 200 درهم وبأس المصير, وطبعاً الشرطة بتعمل ورديات مخالفة لكل الشوارع, بتلاقي دورية بتيجي ع 12 بالليل وبعديها دورية كل نص ساعه, بتخالف كل السيارات الواقفة برات مصفّات البلدية, سواء كانت السيارة مسكرة ع سيارات تانية أو لا.
طيب أحكولنا وين نصف؟ الأماكن بتسكر كلها بعد الساعه 9 المسا أو قبل كمان..
كل ما انزل على الأردن أجازة, بحسدهم كيف بنعمة مش حاسين فيها, وين ما بتروح بتلاقي مصف بكل سهولة بدون طلوع الروح الي بنعانيه كل يوم!
on 
on 
12 عدد التعليقات
at 9:18 pm - 15th March 2008 Permalink
حكومة دبي لقت حلول لكل شيء ما عدا مشكلة المرور , لسا بالأردن الوضع ارحم شوي , بس بالصيف
زي دبي تقريبا , ولا انا ببالغ شوي ؟
المهم الله بعينك شو بدك تعمل.
at 9:20 pm - 15th March 2008 Permalink
الكل بحكي انه الوضع بالاردن بالصيف زي دبي, لا في مبالغة كبيرة… عمان مهما كان فيها ازمة ما بتيجي 1-10 من دبي… عمان وضع الشوارع فيها من افضل, صح بدبي شوارع كبيرة وفش فيها حفر, بس بضل الوضع هناك افضل بكتتتتير…
شكرا لردك
at 9:24 pm - 15th March 2008 Permalink
لما يكون في زحمة في عمان بتكون زحمة خانقة يا معلم , الشوارع ضيقة , حفر , شرطة السير اللي ما بيعرفو شو اللي بعملو بالمرة , انا من هلأ حاسب حساب السواقة بالصيف , ومع ذلك متحمس انو يجي , يا زيمة الحياة بتدب بالبلد , بس انا بقلك اما كتير مرات علقت بزحمة من اطلع منها الا بعد ساعة , الناس كانت تتطلع من سياراتها وتقعد على الرصيف يا زلمة , الشوارع صغيرة والسيارات كل مالها بتزيد.
الله بعين.
at 9:31 pm - 15th March 2008 Permalink
شو رأيك ابعتلك فيزا تجرب السواقة هون يومين 3
i miss amman
at 11:14 pm - 15th March 2008 Permalink
اوكي انا موافق , يلا ابعت , على فكرة انا عمي ساكن بأبو ظبي بس شغلو بدبي , لما يجي عنا على الأردن بيقعد بحكيلنا عن الزحمة في دبي , يعني مش انتا لحالك اللي بتعاني.
at 11:45 pm - 15th March 2008 Permalink
بتذكر مرة في زيارة من زياراتي لدبي كنا بدنا نخلي السيارة و نروح مشي عشان ما نخسر المصف كان روعة
و مرة كل العيلة طلعنا على مكان مش متذكرة وين بس ساعة و احنا نلفلف و 3 سيارات ما شاء الله المهم السيارة اللي فيها ابوي خلاهم يروحو عالبيت …. قرف يومها يا حرام
الله يعينكم
بس مش المفروض البنايات الها مصفات خاصة ؟
at 11:49 pm - 15th March 2008 Permalink
اذا في الأردن البنايات الها مصفات خاصة , انا مستغرب كيف في دبي مافي , هذي شغلة مش ضابطة معهم بالمرة , الناس اللي معها مصاري بتنقلو بالهليكوبتر مش فارقة معهم كتير.
at 12:29 am - 16th March 2008 Permalink
علي: انا معي مصاري كتير , ممكن اشتري هليوكوبتر, بس بحب التواضع
سمسم:شكرا لتعليقك, من فترة الزمت بلدية دبي كل المقاولين انه يعملو مصفات خاصة بالبنايات, بس بعد شو؟؟ دبي معظمها قديم, ومعظم الناس ساكنين بالمناطق القديمة نسبياً زي ديرة ومعظم بر دبي, اما الاماكن الجديدة هي الي فيها مصفات بالبنايات, يعني ع الفاضي…
ان شالله من هون لاخر السنة بدي انقل ع مكان بعيد شوي عن ديرة, وقرف الازمة ولا قرف المصف, نفسي مرة أبيّت السيارة واكون مرتاح
at 1:54 am - 16th March 2008 Permalink
ههههههه ليش منخارك كبير يا معلم , كأنك بتكذب
at 4:48 am - 18th March 2008 Permalink
الله يعطيك العافيه اخي عامر وهذه ازمه صارة بسباب كثرة سيارة علمينا لذلك اوربا لجائة لي قطارات والبسكليتات لكن تخيل الحج راكب علي الدراجه هوائيه او بسكليت راح يقول علي ناس طلعوا علي هظظظظظظظظظظظظظظظظظظظ المجنون شكلو هارب من الفحيص
at 11:57 am - 21st March 2008 Permalink
أأأأأأه أأأأأأأه …. الباركنغ وما ادراك ما الباركنغ!!! حلم الاحلام والله … يعني انا لا بدي بيت ولا بدي شي غير باركنغ اصف سيارتي بعد يوم دوام وساعتين سواقه بالزحمه.
at 3:34 pm - 30th October 2008 Permalink
والله انا شايف العكس
عندكو بدبي المواقف ارحم
انا بالاردن كل يوم بطسوني مخالفتين
وحده رادار والتانيه عشان الموقف ومرات باكل مخالفه ثالثه خفيفه لطيفه باليوم
مع العلم انا لابفطر وبنام خفيف بدون عشاء
يعني مخالفاتي اكتر من وجباتي
أرسل تعليقاً