مدونة أسكدنيا

يوم الخميس الماضي كنت زهقان وقاعد بالسيارة بسمع راديو مزاج, في برنامج يومي بيحي من الساعه 5 للساعه 7 أسمو على الطريق مع رندا, المهم قعدت أسمع البرنامج, حكت المذيعة انه الي حاب يشارك لازم يبعت SMS لرقم معيّن خاص بكل شبكة, وانا من الزهق ما كذبت خبر وبعتت SMS فيها أسمي ورقمي وحرف T.

طبعاً خلال 10 دقايق الا موبايلي برن من رقم أرضي, رديت على التلفون وحكولي أنهم راديو مزاج, وحوّلوني على الهوا لعند رندا عشان أشارك بالبرنامج وتسألني 3 أسئلة, وازا جاوبت صح بدخل بالسحب على رحلة سياحية تقدمة Sky world travel.

رندا سألتني 3 أسئلة من النوع اللي بثبت غباء المتصل, قال شو عاصمة صربيا؟ بلغراد ولا بوركينا فاسو ههههه, والسؤال التاني عن ألوان علم البرازيل والسؤال الـ 3 نسيتو.

بلا طولة سيرة, جاوبت صح ودخلت السحب, وماتابعت البرنامج للآخر لأعرف ازا ربحت أو لا, واللي صار أنه من يومين رنوا علي من راديو مزاج وخبروني لأزورهم وأستلم فاوتشر الجائزة, حكتلها ليش هو أنا ربحت (مع نظرة كونان)؟ حكتلي آه ربحت رحلة لشرم الشيخ لشخص واحد, انا طرت من الفرحة, لأنه أول مرة بحس أنه حظي مش ***.

مبارح رحت ع راديو مزاج لأستلم الجائزة, صارت تحكيلي الموظفة أنه في شرط زغير, حكيت أيوة خير؟؟ صارت تحكيلي لازم حد يدفع ويطلع معاك!!! يعني ما بصير أنه أطلع لحالي!

يعني طلعت الجائزة مقلب من شركة السياحة والسفر وراديو مزاج, برّبحوا المتسابقين وبس يستلم الجائزة بحكولوا أنه لازم حد يدفع ويطلع, ومنطقياً رح “يشمطوا” سعر التكت التانية كتييير, عشان يغطوا سعر الجائزة .

بالنهاية حكولي “خد”… لسه حظك ***.

اليوم كنت ببحبش في Google Earth عن شارع في دبي أسمو “شارع دبي العابر”, أستخدمت ولأول مرة ميزة الخرائط مش صور الأقمار الصناعية, الأشي الي صدمني أنه كل شوارع دبي شارع شارع مذكور بالخرائط, حتى الحواري والسكك والزقق كمان مذكورة بأرقامها وأساميها, يعني أي واحد فيه يوصل من نقطة A لنقطة B  في دبي بدون أي جهد, بس يمشي ع الخريطة ورح يوصل بسهولة تامة.

حتى للي ما بدو يستعمل خريطة, من الصعب أنه يضيع في شوارع دبي, لأنه كل وين ما تروح بتلاقي لوحات بتدل على جميع المناطق في دبي.

بالأضافة الى أنه كل الشوارع فيها لوحات مكتوب فيها أسم الشارع ورقمه وأي تفاصيل تانية أن وجد, على كل حال هيّ Snapshot لجزء من منطقة ديرة في دبي.

بعديها جربت أنه أشوف شوارع عمّان, توقعت أنه ألاقي نفس الشي, أسماء وأرقام شوارع وغيرو, لكن الصدمة أنه ما لاقيت أشي!! لأ أستنوا شوي, مغلبين حالهم, لاقيت أرقام للشوارع الرئيسية داخل حدود مدينة عمّان, بالأضافة للشوارع الرئيسية اللي بتربط العاصمة ببقية المحافظات.

وهيّ Snapshot لعمان كلها على الخريطة زي ما هي مبيّنة في Google Earth .

من فترة بدأت أمانة عمّان الكبرى بإجراءات واضحة من أجل مزيد من التنظيم في عمّان, من تسمية شوارع وترقيم بنايات, وغيرو, ولكن لسه الطريق بأولو, وبحاجة لمزيد من التنظيم, لأنه حسب ما بتوقع أنه Google Earth بياخد المعلومات والخرايط والتفاصيل الي فيها من نفس الدولة على الأغلب, وأنا بعرف أنه صار من فترة في خرايط لعمّان, وأكيد الموضوع ماكان سهل بسبب طبيعة مدينة عمّان الجبلية.

من فترة قرأت في مدوّنة “جزرة” أنه أمانة عمّان بدأت بتركيب لوحات جديدة لأسماء الشوارع, وتحتوي على أرقام البنايات, خطوة جميلة جداً, ياريت يتم تطبيقها في باقي المدن!