لما وصلت لمطار الملكة علياء خلال زيارتي الأخيرة للأردن, أول ما فكرت به أنه ادخن سيجارة جوا المطار,لأنه ما دخنت ولا سيجارة من وقت ما سافرت من مطار دبي الدولي.
في مكان خاص للمدخنين بجنب أحزمة أستلام الحقائب, وللعلم المكان مهجور حتى من دخان السجائر, ما شفت ولا حد بدخن جوا, على الأقل وانا بستنى الشنتة تطلع, كان الكل بدخن في كل مكان, جنب أحزمة الشناتي ومدخل السوق الحره, طبعا مكان المدخنين نعمل كمعلم سياحي داخل حرم المطار لأعطاء السياح فكرة أجابية عن مطارنا “الكبير” بأنه مطار على غرار مطار هيثرو و جي أف كندي وغيره أيضاً.
انا قررت أن اكون ملتزم بالقانون الغير مطبق, دخلت الى غرفة المدخنين لأدخن سجارة, مع أني ما بدخن كتير, بس لسوء الحظ ما لاقيت “ولاعة” معي, قررت أنه أطلب ولاعة من موظف برتبة عسكرية كان على مكتب جنب الأحزمة, رحتلو وقلتلو: “مرحبا يا سيدي” , رد علي: “هلا والله” سألته “بلاقي معاك ولاعة للسيجارة المسكنية هاي؟”, حكالي “أبشر”, وأعطاني اياها,ولما رجعتلو اياها , سألني ازا معي “كروزات” دخان؟ أستغربت من سؤاله, وقلتلو لا والله, بعديها حكالي بدي منك خدمة, حكتلو “أبشر”, طلب مني أروح على السوق الحره لأشتري “كروزين” دخان الأول ميركوري والثاني فايسروي, قلت له حرام عليك يا زلمة, شاري وشاري جيب دخان منيح, هاد حشيش مش دخان, حكالي أنا ما بدخن بس ناس موصيني عليه, ساعيتها عرفت أنه بتاجر بالدخان, ما حبيت أفشلو مازال ماعليها مسؤولية عليّ انا, أعطاني حق الكروزين ورحت أشتريتهم ولما رجعت غمزني أنه أحطهم تحت المكتب عشان في كاميرات في المطار, حسيت حالي عم بسلم كروز حشيش مش دخان!
هاي قصة كروز الدخان الي صارت معي, لأنه كل ما اسافر الا ما تصير معي نهفات, معظمها مع الشرطة الي هناك.
وفي مرة كنت بالمطار كمان بدي أسافر من عمّان لدبي, كنت واصل قبل موعد السفر بأكتر من ساعتين تقريباً, وقفت أستنى الكاونترات تفتح, وكان جنبي شرطي بنظم الدور, فكرت أنه أدخن سيجارة بس ترددت على أساس أنه الشرطي قبالي وأنه “عيب” بلاش نسمع حكي! بعد شوي لاقيتو مطلع سيجارة وبلش يدخن, انا حكتلو مش كأنو ممنوع بالمطار؟ حكالي “هو حد قاري ورق؟”, حكتلو قولتك وولعت سيجارة لأشاركو روحانياً “بلذة” أختراق القانون, ولما سألتو وين ارمي السيجارة؟ حكالي ع الأرض لأنه “المصاروّة” رايحين جايين ينظفوا أرض المطار.
بكفي لهون.. بس سؤال بريء بالنهاية, ليش هيك بصير معانا أحنا؟
on 
