مدونة أسكدنيا

**تحذير: يحتوي الفيديو على مشاهد قد تكون مؤذية للبعض 

لفت نظري هالفيديو في موقع إيلاف عن قيام مجموعة متطوعين في أحدى القمم التجمدة في سويسرا “بالتعري” والمشاركة بدون ملابس في مسيرة للعراة  نظّمتها منظمة حماية البيئة “غرين بيس” وهدفت الى تسليط الضوء على خطورة التغيّر المناخي الذي يتسبّب بانصهار المجاري الجليديَّة في جبال الألب.

ليش ما نفكر عنا بالأردن بفكرة قريبة من الفكرة هاي؟ الشعب كلة يتعرى عشان يضغطوا على الحكومة أنه تخفض أسعار البترول وتدفع الفرقية من جيبتها بدال ما المواطن الطفران نازل يدفعوا من جيبتو المخزوقة أصلا؟ وأنه تزيد الرواتب 70%  مع دعم المحروقات ومكافئة الموظف المثالي الربع سنوية لحتى ما تضل كذبتي مجرد “كذبة نيسان”؟ 

لازم يتم ترتيب مسيرة عارية في شوارع عمّان, بتنظيم من أمانة عمان وتصريح من وزارة الداخلية ورعاية من زين وأورنج تحت شعار “نحو شعب أكثر عرياً”.. وطبعا لازم يكون في تنظيم “للتعري” الي رح يصير بالشوارع, يعني يكون التعري أسبوع كامل مش يوم واحد على مستوى أرتفاع الأسعار الى “شلّح” الشعب المسكين, طبعاً كل يوم المسيرة بتستمر لمدة ساعتين, ويوم الخميس والجمعة للعائلات فقط, وبهاي بنجيب موظفي مكة مول اللي لابسين أسوّد بأسوّد زي الكوماندوز وشكلهم زي الي حد ضاربه شفرة لحتى ينظموا المسيرة بالشوارع.

المسيرة مالازم تطلع عن حدود عبدون والرابية والصويفية والضواحي القريبة وعلى القاطنين حولها مراعاة فرق التوقيت والقدوم مبكراً, لأنه لو كانت بمكان تاني بره الأماكن سابقة الذكر ممكن يصير أمور تانية لا يحمد عقباها

بالنهاية, كل الحكي الي حكيتو مزح × مزح, ما بدي حد يفوت ويعلقلي تعليقات زي التعليقات الي قريتها بموقع إيلاف…

بس هاد ما بنكر أنه أحنا “عريانين” وصرلنا من زماااان بمسيرة “لا نهائية” وبدون تصريح كمان…!

سلام