مدونة أسكدنيا

مبارح كنت قاعد مع الشباب بنحضر مباراة أسبانيا والمانيا في نهائيات كأس أوروبا, بعد ما خلصنا كنّا كتير جوعانين, المهم جزء من الشباب بدهم ياكلو في بوبايز وجزء تاني بدهم ياكلو بيتزا هت, فقررنا نروح على شارع المدينة المنوّرة وكل واحد يطلب اللي بدو اياه وبالآخر نقعد على طاولة وحدة, لأنه المطعمين جنب بعض وبنفس المبنى.

اللي بدو بيتزا راح قعد وطلب, وانا وكم واحد رحنا على بوبايز وطلبنا أكل, حكولنا أستنوا ربع ساعه, سألت الموظف لو أخدت الوجبة معاي على البيتزا وأكلتها مع الشباب عادي؟ حكالي آه مافيها مشكلة.

أخدنا وجباتنا ورحنا على البيتزا هت, أول ما الموظف اللي هناك شاف وجبات البوبايز معانا, حكالنا “معلش حضرتك ده البوبايز ممنوع هِنا”.. حكتلو ليش يخوي؟؟ هو أحنا جايبين معانا سلاح؟ رح نادالي الـ Supervisor , اجى لعندي وبحكيلي معاك فلان الفلاني Supervisor  المطعم, طبعاً كان يحكي بلهجة هجومية نوعاً ما, وصار يحكي ممنوع وجبات البوبايز هون بالمطعم, حكتلو ليش شو المشكلة يعني؟ المطعمين جنب بعض وصحبانا بدهم ياكلوا من عندكم وأحنا بدنا نقعد معاهم؟ حكالي ممنوع, حكتلو شو الجريمة؟؟ رد علي أنه الجريمة بالموضوع أنه أحنا شركة وهم شركة تانية, حكتلوا واذا يعني؟ بلشت لهجتو تعلى مع الوقت وانا بلشت أتنح, حكتلو طيب بصير خير, ورحت على الـ Supervisor  الي بمطعم بوبايز, وحكتلو الي صار, حكالي بالعادة بسمحوا أنه وجبات بوبايز تدخل هناك, بس شكلو بدو “ينكش مخو” علينا, المهم أجى الشب معاي على مطعم بوبايز وحكالي أنه احكي أنه Supervisor مطعم بوبايز بكون أبن خالتي يعني واسطة, وفتت انا وياه على البيتزا هت, حكالو ليش هيك يا زلمة بتعمل بأبن خالتي, الـ Supervisor بالبيتزا هت صار يضحك وحكالي تفضل عادي..

يعني حتى بالمطاعم لازم فيتامين واو يشتغل

اليوم كانت أول مرة بزور القنصلية الأردنية في دبي, كنت بالعادة أمر من جنبها دايماً, بس بعمري ما فكرت أدخل جواتها لأنه بالعادة ما بحتاجها الأ نادراً.

المهم, اليوم الصبح رحت مع صديق الي للقنصلية الأردنية عشان نجدد جواز سفرو, قعدنا جوا القنصلية حوالي ساعتين وشوي, طلعنا بخيبة أمل شديدة للوضع “المزري” للقنصلية وللعاملين فيها.

نيجي للتفاصيل, البداية كانت أول ما دخلنا على القنصلية, أول ما بتفوت عليها بتشم هوا بلادك, هوا دخان الفايسروي و LM والأنواع التانية اللي بدخنها الموظفين في السفارة, شكلو الموظفين مش حابين يحسّوا بالغربة لذلك بدخنوا نفس نوع الدخان اللي تلتين الشعب الأردني بحبو, ومش بعيد يكون مهرب من الأردن… ما علينا

لما تفوت على القنصلية بتحس حالك داخل على دائرة حكومية بالأردن, كل شي فوق بعض, مافي نظام…الخ من المشاهدات اللي متعودين عليها بمعظم الدوائر الحكومية, المهم, على يمينك مكتب أستقبال بخدم عليه موظف واحد فقط لا غير, وقدام المكتب في حوالي 30 واحد ويمكن أكتر شوي, العالم رح تدبح بعض, اللي بدو يشوف شو صار بمعاملة جوازو واللي بدو يشوف اذا طلعت الفيزا تبعتو أو لأ, واللي بدو رقم دور عشان يستنى مع العالم اللي تخللت من الصبح وهي بتستنى, والموظف يا دوب ملحق ع العالم, ونصيحة أنه ما حد يحاول “يستفسر” عن أي شي من كاونتر الأستقبال, لأنه الموظف مش فاضيلك ومشغول بعشرطعشر شغلة بنفس الوقت…

لفت نظري أنتظار فتاة على كاونتر الأستعلامات للأستعلام عن معاملتها, بعد فترة صارت تصرخ على الموظف وتحكيلو صرلي ساعه بستنى وفش أحترام لا لبنت ولا لحد, الموظف رد عليها وحكالها:أستني دورك؟ حكتلو وين الدور طيب؟ مارد عليها ,لأنه أساساً مافي دور, والموضوع بعتمد على دفاشة الشخص وقابلية الشخص اللي قدام أنه حد “يلزّق” فيو من ورا !!!

نيجي لرقم الدور, في بالقنصلية نظام الكتروني للدور, بس طبعاً معطل, فلذلك الموظف بكتب رقم تسلسلي بخط أيدو وبيعطيه للمراجع وبقلوا روح أستنى ع الكراسي.

نيجي للموظفين اللى على كاونتر المعاملات, في 4 موظفين فقط لا غير, وكل موظف فيهم مختص بشي واحد بس, الأول لأستلام معاملة تجديد الجوازات والهويات ..الخ, والتاني صندوق وطوابع, والتالت ماشفتو بعمل شي, والموظف الرابع مختص بتأشيرات الزيارة “الفيزا”, يعني ما الك الا تستنى دورك وأنت ساكت, وطبعاً الموظفين لما ينادوا على الأرقام, بنادوا بالعربي, وكأنو الكل بفهم عربي, أنا لاحظت أنه في كتير مراجعين للتأشيرات كانوا ضايعين, كل ما الموظف ينادي على رقم بسألو اللي جنبهم اذا هاد رقمي أو لا, هاد غير أنه أحد الموظفين فهمان الأنجليزي غلط, لما يجي واحد أجنبي يطلب منو فورم للفيزا, الموظف بسأله: شو جنسيتك ؟ المراجع الأجنبي بحكيلو WHAT?? برد الموظف يسألو كمان مرة:قلتلك وشّو (شدّة على حرف الشين) جنسيتك (مع نبرة صراخ)؟ برد الأجنبي بنفس الجواب, بعديها بكتشف الموظف أنه المراجع بحكيش عربي, بقلو “واطس يور ناشيونالطي”, بطريقة ما بفهمها الا اللي عايش بساحل العاج بس..!!   وطبعاً معظم اللوائح والأرشادات بالعربي كمان, واللي بحكيش عربي ما ألو الا ياخد كورس عربي قبل ما يفكر يزور القنصلية.

النكتة أنه في صورة كبيرة للبترا في القنصلية, مكتوب تحتها صوّت للبترا للفوز بمسابقة عجائب الدنيا السبعة الجديدة عبر زيارتك للموقع الفلاني أو الأتصال على الارقام التالي *****… حسيت حالي بالسنة الماضية وقتيها..

النتيجة, القنصلية عبارة عن دور وأزمة وفوضى ومافي نظام واللي ما بعرف شو يعمل راحت عليه..

هاد مختصر عن تجربتي المريرة في القنصلية اليوم, وبتمنى هالحكي يوصل لأي مسؤول لحتى يتم أعادة النظر بمستوى الخدمات المقدم في القنصلية الأردنية وكمان السفارة اللي في أبو ظبي.