مدونة أسكدنيا

زار سمو الشيخ كيفانتش بن تاتليتوغ (مهند) اطال الله في عمره المملكة الأردنية الهاشمة بدعوة -وشوية ترجاية- من جمعية الأمل للأنتاج الفني, وقد كان في إستقبال شيخنا  الفضيل ثلة من البنات في مطار الملكة علياء الدولي, حيث نقل مراسلنا في موقع الحدث أن البنات وبعض الشباب قد تهافتو منذ ساعات الصباح الأولى لأستقبال سمو الشيخ مهند في أرض الوطن.

وقد تم نصب خيّم للترحيب بضيف الأردن الكبير في وطنه الثاني الأردن, لما في هذه الزيارة أهمية إستراتيجية كبرى للحد من حوادث و أزمات السير بالأردن وإنتشار أمراض البوّاسير وغيرها.

وقد قدم سمو الشيخ مهند إعتذاراً رسمياً للشعب العربي عمّا سببه مسلسل نور من حالات طلاق ومشاكل زوجية, مبرراً ذلك “بقلة” عقل المواطن العربي, ورداً على من أعتبره “شاذاً جنسياً” قال سمو الشيخ مهند بأن من أطلق هذه الأشاعة “غيران” من جماله و هدفه التقليل من حجم المعجبات وتقليل حالات الطلاق بين الأزواج.

وفي لفتة عظيمة الشأن منه, قام سموه اليوم بزيارة مركز سيدة السلام لذوي الاحتياجات الخاصة في الاردن, ووزع هدايا وحقائب مدرسية على الاطفال من ذوي الاحتياجات الخاصة (أبصر على حساب مين الهدايا).

وقد علّق أحد الشباب “الديونجية” على زيارة مهند للأردن بالقول: “وااااال, إذا هو هيك حلو, كيف أختو لعاد؟؟!”

أدام الله لنا سموه وأبقاء تاجاً على رأس العربي, والله أكبر وعاشت أمتنا المجيدة .

الفكرة التي أردت إيصالها تختصرها مقالة الصديق أسامة الرمح هنا .

وبستمر مسلسلي المستمر مع شوفرية التكاسي الأشاوّس, وزي ماحكيت بالأول أنه لو بدي أكتب عن كل قصة بتصير بيني وبين شوفير تكسي مارح أخلص, بس القصة اللي صارت اليوم معي ماقدرت إلا ما أكتبها, وهي عبارة عن “كولكشن” مواضيع داخلة ببعض لا تمت بصلة لبعض من أساسو, ومعلش إحنا بنعرط على قولة القرموطي.

بدت قصتي اليوم لما ركبت مع شوفير تكسي, ودار (حلو كلمة دار) بينّا الحديث التالي بمجرد ما سألني شو دارس, حكتلو دارس نظم معلومات إدارية, الأخ طلع دارس برمجة كمبيوتر من جامعة العلوم والتكنولوجيا, انا إستغربت لما عرفت هيك, حكتلو يعني ما تآخذني, بس ليش شغال شوفير تكسي؟ حكالي ما يغرك أنه انا شوفير تكسي, حكتلو ولا شو؟ حكالي أنا موظف حكومة!!

انا لما سمعت أنه شغال موظف بالحكومة, صرت أضحك, بعدين سألتو بأي وزارة أو دائرة شغّال؟ طبعاً رفض يحكيلي, حكتلو من شو خايف, انا بعرف أنه بالقانون ممنوع موظف الحكومة يشتغل شغل تاني,بس عادي يعني سرّك في بير حكالي لا مابدي أحكي, بلاش بكرة تيجيني على الدائرة ويكون كلمة السر بيناتنا “تكسي” .

حكتلو طيب ليش شغال شوفير تكسي؟؟ حكالي بدك إياني أعيش بـ 265 دينار اللي باخدهم آخر الشهر من الحكومة؟ من زمان رح أموت من الجوع, أما التكسي بساعدني وبالموسم بطلع بالشهر 500 دينار زيادة.

المهم أخينا قعد ينظر بالوضع السياسي على المستوى المحلي والدولي والإقليمي, ما خلّى موضوع إلا وحكى فيو, زي غلاء الأسعار, غلاء البنزين, زيارة باراك أوباما للأردن وإسرائيل.

المشوار طوّل والشوارع أزمة, وهو بسلّي حالو وبطلع روحي بالمواضيع العقيمة اللي بحكي فيها, لأنه بحكي بكل شي من منطق سطحي جداً وغريب أحياناً.

ماعلينا, النكتة اللي سطحتني بآخر المشوار, لما حطوا أغنية على راديو أمن إف أم لـ جواد العلي, قعد يسمع فيها ويحكيلي أنا ولا بطيق نوال الكويتية,طبعاً أنا ما حاولت أفهمو غلطو وأقلو مين بغني بلاش أجرح مشاعرو.

طيب شو موقف جواد العلي لما يعرف أنه في ناس بسمعوه على أنه نوال الكويتية؟ أو شو بدو يكون موقف نوال لما تعرف العكس؟؟

تحشيش..