مدونة أسكدنيا

مبارح كنت بتناقش انا وصحابي عن موديلات الموبايلات الي كل واحد منا إستخدمهم من أول مرة جاب موبايل لغاية الآن, انا قعدت أفكر لاقيت حالي أشتريت كتير موبايلات.

بدي أحط صورة كل موبايل أشتريته من أول مرة حملت موبايل فيها بسنة 2000 لغاية اليوم… سبع سنين والله كتير.

1. Ericsson T10

هاد كان أول موبايل أشتريته, كنت بقدم توجيهي أيامها, ما كنت بعرف حد معو موبايل بالمرة ..

الموبايل هاد خفيف كتير وحجمو حلو وستايلو كان عامل جوّ ايامها.

2.Ericsson A2628

بعتبر هاد الموبايل غلطة حياتي, مش عارف عشو حبيتو وأشتريتو أيامها, يمكن لأنه كان فيو شوية ميزات غير عن الموبايلات التانية, ع كل حال ما طوّل معير كتير, أقل من 6 أشهر كنت بايعو

3.Siemens A35

أخيراً غيرت من أريكسون للسيمنز, مش عارف ليش كنت ملزق بالاريكسون

هاد الموبايل مافيو ولا ميّزة, بس أنه شكلو حلو زي البطة, وحجمو زغير كتير.. ماشي حالو .

4. Alcatel OT512

موبايل الكاتل “القاتل” إشتريتو أيامها عرض من فاست لينك, نغماتو زي الطبلة المخزوقة

ضلو معاي أسبوعين وأنسرق بعديها

5. Nokia 8310

هاد كان أول موبايل نوكيا بشتريه, حجمو حلو ومميزاتو كانت كتير منيحة أيامها, كنت بدي أشتري 3310 ايامها, بس دفعت زيادة شوي وجبت هاد.

6. Siemens SX1

“يا مسترخص اللحمة عند المرقة بتندم” .. هاد الي صار معاي بالزبط أيامها, أول ما طلعت موضة الموبايلات الملوّنة والكاميرات كمان, كنت بدي اشتري نوكيا 6600, بس كان سعرو غالي, ويومها لاقيت نفس المواصفات بالسيمنز بس بسعر أرخص, طبعاً هالموبايل معيّد وكلو مشاكل , وماكان يكتب عربي ولا يستقبل عربي , والوكالة تبعه بالأردن تعبانة كتير.. ضل معي سنة وشوي وبعدين بعتو ب 30 دينار

7. Nokia N70

نقلة نوعية بكل الموبايلات الي حملتها, موبايل رائع, وميزاته حلوة, كان فيو مشاكل بالسوفتوير, كان بعلق وبعمل ريستارت, بس ماشي حالو.

8. Nokia N73

بعت N70 وأشتريت هاد الموبايل.. كان أحسن شي فيو كاميرتو, كانت 3.2 ميجا بكسل, ضلو معاي حوالي 6 أشهر لغاية ما أجى واحد أبن حلال وسرقو من مكتبي

9. Nokia 1600

بعد ما نسرق مني موبايل N73, أشتريت هاد الموبايل تمشاية حال عبال ما أجيب موبايل تاني.. موبايل صفر ميزات, بس أنه شاشتو ملونة بس

10. Nokia 6300

موبايل شكلو وحجمو رائع, وميزاتو حلوة كمان, رفيع كتير, ونص البلد صار معاها منو.. \

عيبو بالبطارية تبعتو, أقل من يوم بتخلص.. يعني ازا واحد بحب عليه مارح توّفي معو

11. Nokia N81 8 Gb

هاد الموبايل ضل معي يوم واحد ورجعتو تاني يوم, ميزاتو حلوة بس مشكلتو أنه بعلق, طلع من عيني ورجعتو تاني يوم للمحل الي شريتو منو.

12. Nokia 5610

هاد الموبايل الي حالياً معي.. لغاية الآن شغال 100% تمام.. ميزاتو حلوة وكاميرتو منيحة وشكلو رائع كمان..

بكفي لهون..

لا أنكر أعجابي بفكرة شعار شركة PlayBoy منذ زمن طويل, ولكن بالمقابل كوّن أرتباط العلامة بأكبر شركة تروّج للأباحية في العالم, جعلها من أقبح العلامات في العالم.

في الفترة الأخيرة, أنتشرت منتجات كثيرة في الأسواق العربية, تحمل شعار بلاي بوي, وأحنا ماشالله علينا بنقلد تقليد أعمى بدون أدنى تفكير, بتلاقي البنات بلّشوا يلبسوا أواعي عليها شعار بلاي بوي, أو يحملوا شناتي عليها الشعار, بالاضافة لمعظم الأكسسوارات الي عليها شعار الشركة “العملاقة” بأنتاج الجنس وتسويقه.

قبل فترة كنت في مطار دبي الدولي قادم من عمّان, كان في امرأه عربية معنا في الطيارة, لابسة كل شي عليه شعار بلاي بوس, من البلوزة للبنطلون والشنتة, على الحلق الي كانت لابسيتو عبارة عن لوجو الشركة, تخيلت للحظة أنها شغالة عندهم, بس مش معقول, لأنه كانت بنتها الزغيرة معاها ع الطيارة.

ما علينا, لازمنا تفكير كبير قبل ما نعمل أو نلبس أي شي, أسلوب حياتنا ما لازم يكون للتقليد فقط لا غير.

في خبر متصل, نشرت جريدة العرب الصادرة في قطر, خبراً عن قيام حملة لمقاطعه منتجات شركة بلاي بوي في قطر, وفيما يلي صورة من الخبر .

ملاحة: تغلبت كتير عشان أجيب لوغو بلاي بوي, لأنه في الأمارات بمجرد كتابة كلمة PlayBoy في جوجل أو ياهو, بيعطيك أنه الموقع محجوب بسبب جر جر جر جر جر …الخ , بس ما غلبت, دبرت حالي وجبتو