| 
ليس هناك خطأ إملائي بالعنوان, فقد قصدت بالفعل كتابة “سكراب عبدون المعلق” بدلاً من جسر عبدون المعلق,بسبب الحالة المزريّة التي وصل اليها الجسر المعلق اليتيم في الأردن.
|
من فترة وانا عم بشوف أعلانات بالجرايد عن موضوع ترتيب أمانة عمّان الكبرى لتجهيز إحتفال كبير بمناسبة مئوية العاصمة عمّان.. شي حلو كتير.
القضية اللي حابب أحكي فيها اليوم هي موضوع المجسم اللي زي “باكيت المالبورو” اللي موضوع على الدوار السابع في عمّان, المجسم البشع جداً والمتآكل جداً وجداً.
|
اليوم وصلت على عمّان في إجازة “رمضانية” لبعد العيد ان شالله, إستنوا عدة مواضيع أردنية خلال زيارتي الحالية للأردن..
وكل عام وانتوا بخير, ويا محلى رمضان بالأردن بين الأهل والصحاب هون.
رمضان كريم
|
ورجعنا على دبي, بعد أجازة طويلة نوعاً ما في ربوع الأردن, لما نزلت الطيارة في مطار دبي صارت تحكي المضيفه أهلاً بكم في مطار دبي الدولي, الساعة الآن تشير الى 6 مساءً ودرجة الحرارة في الخارج 39 درجة مئوية, انا بصراحة خف عقلي لما سمعت درجة الحرارة, حكيت الدنيا مغرب والحرارة 39؟ معناتو بكرة الظهر كم رح تكون الحرارة؟ هاد غير الرطوبة القاتلة, حاسس حالي بغرفة ساونا انا.
المهم, رجعنا للشغل والنظام والقرف بنفس الوقت, قضيت أجازة بعمّان من أحلى الأجازات, كنت حابب أسافر على مارمريس بتركيا وما زبطت, حاولت أسافر على حيفا وتل أبيب ولسه ولا عم بستنى جماعة السفارة يحنّوا عليّ ليعطوني فيزا لهناك, بس شكلو عيييييش يا كديش ليجي الحشيش وحشى السامعين.
إشتقت لعمّان وجوّها الرائع, مبارح بالليل كنت قاعد بقهوة جنب مكة مول, كان برد بالليل.
من وقت ما وصلت دبي لهلا صرت شايف 3432 هندي
.
بكفي لهون, النا رجعة بكم موضوع جداد هالأسبوع.
|
وبستمر مسلسلي المستمر مع شوفرية التكاسي الأشاوّس, وزي ماحكيت بالأول أنه لو بدي أكتب عن كل قصة بتصير بيني وبين شوفير تكسي مارح أخلص, بس القصة اللي صارت اليوم معي ماقدرت إلا ما أكتبها, وهي عبارة عن “كولكشن” مواضيع داخلة ببعض لا تمت بصلة لبعض من أساسو, ومعلش إحنا بنعرط على قولة القرموطي.
بدت قصتي اليوم لما ركبت مع شوفير تكسي, ودار (حلو كلمة دار) بينّا الحديث التالي بمجرد ما سألني شو دارس, حكتلو دارس نظم معلومات إدارية, الأخ طلع دارس برمجة كمبيوتر من جامعة العلوم والتكنولوجيا, انا إستغربت لما عرفت هيك, حكتلو يعني ما تآخذني, بس ليش شغال شوفير تكسي؟ حكالي ما يغرك أنه انا شوفير تكسي, حكتلو ولا شو؟ حكالي أنا موظف حكومة!!
انا لما سمعت أنه شغال موظف بالحكومة, صرت أضحك, بعدين سألتو بأي وزارة أو دائرة شغّال؟ طبعاً رفض يحكيلي, حكتلو من شو خايف, انا بعرف أنه بالقانون ممنوع موظف الحكومة يشتغل شغل تاني,بس عادي يعني سرّك في بير
حكالي لا مابدي أحكي, بلاش بكرة تيجيني على الدائرة ويكون كلمة السر بيناتنا “تكسي” 
.
حكتلو طيب ليش شغال شوفير تكسي؟؟ حكالي بدك إياني أعيش بـ 265 دينار اللي باخدهم آخر الشهر من الحكومة؟ من زمان رح أموت من الجوع, أما التكسي بساعدني وبالموسم بطلع بالشهر 500 دينار زيادة.
المهم أخينا قعد ينظر بالوضع السياسي على المستوى المحلي والدولي والإقليمي, ما خلّى موضوع إلا وحكى فيو, زي غلاء الأسعار, غلاء البنزين, زيارة باراك أوباما للأردن وإسرائيل.
المشوار طوّل والشوارع أزمة, وهو بسلّي حالو وبطلع روحي بالمواضيع العقيمة اللي بحكي فيها, لأنه بحكي بكل شي من منطق سطحي جداً وغريب أحياناً.
ماعلينا, النكتة اللي سطحتني بآخر المشوار, لما حطوا أغنية على راديو أمن إف أم لـ جواد العلي, قعد يسمع فيها ويحكيلي أنا ولا بطيق نوال الكويتية,طبعاً أنا ما حاولت أفهمو غلطو وأقلو مين بغني بلاش أجرح مشاعرو.
طيب شو موقف جواد العلي لما يعرف أنه في ناس بسمعوه على أنه نوال الكويتية؟ أو شو بدو يكون موقف نوال لما تعرف العكس؟؟
تحشيش..
|
شوارع عمّان وما أدراك ماشوارع عمّان؟؟ لازم ينكتب تحذير على جميع مداخل عمّان ينكتب فيو: شوارع عمّان سبب رئيسي لأمراض العامود الفقري والروماتيزم وأنزلاق الغضاريف وإرتجاج الدماغ.
مع أني مش حابب أقارن بين هون والأمارات لأنه في ناس عم بتحسّسوا من المقارنة, بس حاسس حالي مضطر للشي هاد, يعني فعلاً وضع الشوارع عنّا مزري جداً جداً, فش شارع بمشي فيو إلا بوقع بـ 100 حفرة ومطب وبضل طالع نازل بين رُقع بالشارع وغيرو, بقول يا الله طيب ليش هيك؟ نفسي أمشي بشارع يكون زي العالم والناس بدون ما أقضيها زي اللي بيلعب Play Station عشان يهرب من الحفر.
أمانة عمّان قامت بتزفيت طريق المطار خلال الأسبوع الماضي, خطوة رائعة جداً, لأنه طريق المطار هو الوجه الحضاري للبلد, وهو أول شارع بشوفو أي سائح بفكر يزورنا, طبعاً بالفترة الأخيرة كان وضعوأ مميت جداً, ولكن الحمدلله الوضع صار أحسن حالياً.
وكالعادة, أول ما يخلصوا تزفيت أي شارع, بتزكروا أنه في ماسورة ميّ فاقعة تحت الأرض أو بتزكروا خط كهربا مشرت, بروحوا يحفروا الشارع مرة تانية, وبعدين برّقعوا الحفرة ترّقيع!! وبهيك خلال فترة زغيرة بتلاقي الوضع رجع زي ماكان, يعني محل ما *** شنقوه
نرجع لموضوع المقارنة, من أحد أسباب خراب الزفتة بكتير من شوارع عمّان وبقية المدن هو أنه أمانة عمّان بتوكل عملية تزفيت الشوارع لشركات خاصة عبر عطاءات معينة, بعكس بلدية دبي “ممثلة بهيئة الطرق والمواصلات” اللي بتشرف على عملية التزفيت ونوع الزفتة “الأسفلت” بنفسها وبكوادرها الخاصة, لذلك بتلاقي الشوارع كلها 100% مزبوطة, لأختلاف نوعية الزفتة المستخدمة طبعاً.
بضل بالآخر أحكي أنه ما بدي أحط كل اللوم على أمانة عمّان أو الشركات الخاصة, لأنه معظم الشوارع بتخرب وبصير فيها حفر بعد فصل الشتا من كل سنة, لكن هون بكون دور الأمانة بالصيانة السريعه بعد أنتهاء فصل الشتا, وهاد الشي اللي ما بنشوفوا, لأنه علاج المشاكل بكون بطئ جداً جداً.
|
اليوم ركبت مع شوفير تكسي أكل راسي قد ما صار يسولف مواضيع “خرّطي”, المشوار كان طويل نوعاً ما (من الدوّار السابع لشارع الجامعة الأردنية), ما صدقت على الله أنه أوصل.
بأختصار, دار بينّا الحديث التالي بمجرد أنه الشوفير شاف بنتين فلبينيات قطعوا الشارع.
الشوفير:يا عمي والله الفلابنة (قصدو الفلبينية) ألهم جمال رباني بخوث خوث.
أنا:يا زلمة شو بتقول؟ مش لهدرجة, بضل الجمال الوطني الو نكهة خاصة.
الشوفير:يا حبيبي الجمال الفلبيني الو نكهة جميلة جداً (مع شدّ على حرف الجيم).
أنا:شو المميز فيهم؟ بشوف عنيهم ممغوطات زي الصواينة (جمع صيني).
الشوفير:انا تعرفت على 4 بنات فلبينيات من الآخر, “بشلـgـوا شلـg”.
أنا (بقرف شديد ومغص كمان): وين تعرفت عليهم؟
الشوفير:والله هظيك المرة كنت واقف عند الدوار السابع, لاقيت 4 بنات بحاولوا يوقفوا تكسي, ولا تكسي راظي يوقفهم, انا حكيت لحالي خليني أشوف وين رايحات البنات, ماكذبت خبر ورحت لعندهم ووقفت, حكتلهم لوين رايحات انتوا؟
آخر الأخبار من الجزيرة
on دم للبيع, لحق حالك
on دم للبيع, لحق حالك on دم للبيع, لحق حالك on دم للبيع, لحق حالك on هل أنت راض عن أمانة عمان الكبرى؟
